ITSASOAREN EZPAIN GAZIAK

 

Elurra itsasoa besarkatu nahian dabil

aurtengo neguan berriz ere,

Kontxako turisten selfietan eta albistegietan

protagonista bihurtu nahi du.

Hodeiak belztu dira,

haizea indartu

baina alferrik!

Itsasotik hirurehun metrora gelditu da

mendigainak eta asfalto beltza irindu eta gero.

Nekatua bezain triste dago.

Etzana,

           abaildua,

                         leher eginda...

 

Iruñeko Udaleko langileek

gatza bota diote gainera

autoen eguneroko joan etorria errazteko.

Eta elurrari itsasoaren ezpain gaziak

etorri zaizkio burura

eta nostalgiaz,

penaz   

minez...                      

urtuz doa                                            

naturaren sentimenduei buruz

ezer gutxi dakien

gizarte aitzinatu honen asfalto ilunean.