EGUBERRIAK

 

 

I

 

Begiradak zabalegiak

eta manikiak argalegiak somatzen ditut

norabiderik gabeko kale honetan.

Eguberrietako argiek

gorpu(tz) honen itzala

areagotu bertzerik ez dute egiten.

Lurrundutako kristal labainkorra da nire bisaia.

Urrundutako burmuin labainkorra neure burua.

 

Hanka dorpe eta astunez

Camperrak

putzu sakon batean murgildu ditut,

baina ez dauka zer bustirik urak

tristuraren zipriztinetan

blai eginda dagoen haragi zati honetan.

Oroitzapenen artean,

Gabon kantak mututu dira bat-batean

eta ez da isiltasunaren itzala baino gelditu

argiz betetako kale jendetsuan.

 

 

II

 

Neguak pagoak biluztu

eta izeiak girnaldez jantzi ditu.

Egunak laburtu

eta udako minigonak luzatu.

Erakusleihoak beherapenez bete

eta gure etxea zorionez hustu.

Eta udaberriak

pagoak jantzi,

izeiak biluztu,

egunak luzatu,

gonak laburtu

eta erakusleihoak beherapenen ehunekoez hustuko baditu ere,

ez da zorionez beteko gure etxea.

 

Mahaia jantzirik,

erraiak biluzik,

oroitzapenez beteta

eta ilusioz hustuta;

ospakizuna labur

baina Gabon-gaua luze doakigun

goserik gabeko otordu oparo hau lekuko.