Egiak

Egiarekin egindako ezpatek

dute gizona hil.

Egiak ditu legeak egin

eta lege gabeak urkatu.

Egiak egin ditu gosea

eta gizon lodiak.

Egiarekin zuritu dugu

haurraren esnea.

Egiak ezkondu ditu

ez zirenak maite.

Egiari besoak moztu dizkiotelako

nere ama negarrez.

Egiaz eskuak beteta,

baserritarra joan da solora,

egiaren soloa,

egientzat artoa.

Egiak eraman du

Espainiara soldado.

Egiak jotzen ditu

nere herriko kanpaiak.

Egiaz beteta dira

neska hutsaren sabelak.

Egiak dio anai arrebaren

semea ez dela egia.

Egiak du aita santua egitu.

Egiak egin ditu

Euskal Herriko lainoak.

Egiak utzi ditu

gaurik gabe sorginak.

Atzo entzun nuen

haur bat jaio dela

eta gezur izena duela.