SUTZARRA

Deun Jon! Mendirik-mendi, ixar igazkor-antzez,

su-min distiratsuba ijutika dua;

mendi-gallur-tontorrak ixijotuten dira;

garrak dar-dar-dagije, ortzerantz egazka.

Deun Jon! Gar andi batez argittu da illundija;

beriala beste bat urrun agirtzen da,

urrunago beste bat, ta beste bat urrengo...

Laster mendi gustijak bai-dagoz sutetan.

Deun Jon! Basetxe zuri zarreko enparantzan

neska-mutillak dagoz sutzarrai biraka,

ta eskutik elduta, alai eta pozarren,

oinketan diñardube, santzo ta ijutika.

Deun Jon! Deun Jon! Egunik alayena guretzat,

gogo-gaste ta bijotz-sutsu garanontzat;

ortzian iñoz baño argijago euzkija;

sutzarrak dirala-ta gaba ezta illuna.

Ta sutzarrai biraka orok abes-dagije:

«Deun-Jon-an zorgin, eltxo ta zorri gustijak

erretan dira, baster osuak garbitturik.

Aupa, bizkor gustijak, subari biraka!»

                        * * *

Argi-egik, sutzarroi! Izpi-egik betiko,

asabaen basetxe zar-zarra argijetan!

Euzko-basetxietan itxungitten ez itxi

antziñeko ixakera, mattasun-berua.

Mendijez-ostez iri begira yagozakan

atzerrittar goseti ta areyo malmutzak

ezagije iñoz-iñoz itxungitten ikusi,

eugaz ilgo dalako euzko-basetxia.

Argi-egik, sutzarroi! Izpi-egik betiko!

I az gu-aberrija jabon yuan suba;

emen dozak ondiño zorgin, eltxo ta zorri

itxelak, aberrija zikintzen yuenak.

Eurak sakaildurarte, argi-egik, sutzarroi,

argi-egik, batez-be, Deun-Jon-gau onetan.

Aberriko basterrak garbi geraturarte,

aupa, bizkor gustijok, subari biraka!