SUKALDIAN

Eskaratz zabalan sendija batuta

sukaldian dago; atan edurra,

txingorra ta otza; barruban berua;

gastañak erretan danboliñetan.

        Txipli-txapla-pun,

        gau txarra pozarren

        igaro daigun.

Neskatil ederrak iruten diñardu;

etxeko anderak maya gertauten;

erretan attea; umiak ixillik,

attonaren ipuin zarrak entzuten.

        Txipli-txapla-pun,

        gau txarra pozarren

        igaro daigun.

—Bein, antzin-antziñan, akelarre baten

zorgin itxusijak batzaldu ziran;

umetxu politta zorgiñen artian

kikilddu, bilddurrez, dardar eguan.

        Txipli-txapla-pun,

        gau txarra pozarren

        igaro daigun.

Umiak adurraz espanetan dagoz

attonaren ipuin zarra dala-ta;

attea irribarrez; samurkiro ama;

alaba politta oldoztun-samar.

        Txipli-txapla-pun,

        gau txarra pozarren

        igaro daigun.

Umiak dakuse kebidiaz bera

zorgin itxusijak itxuski-gañan;

alaba samurrak sutzarra-barruban

mutil mattiaren itxura apaña.

        Txipli-txapla-pun,

        gau txarra pozarren

        igaro daigun.

Txadonan zortzirak jo dauz jualiak;

agureak diño: gaurko naikua;

ameak: bai-dago aparija gertu;

ta bai-duaz alai gustijak maira.

        Txipli-txapla-pun,

        gau txarra pozarren

        igaro daigun.

Lusagarra ugari; gura-aña txarriki,

ura baxen eurrez be sagardaua;

umiak jangarraz, jangarraz nausijak;

aginkada onak, zurrut obiak.

        Txipli-txapla-pun,

        gau txarra pozarren

        igaro daigun.

Mai luze-inguruban sendija batuta

apaltzen diñardu; atan edurra,

txingorra ta otza; barruban berua,

bai eskaratz bertan, bai urdalletan.

        Txipli-txapla-pun,

        gau txarra pozarren

        igaro daigun!