AURRERA!

Zaldija laroinka, basuaz aurrera,

aulkijan etzunda, arnasa-oska,

tximistia legez zidor-bide-ziar,

gaste epebakua aurrera dua.

Bere burubari joranez diñotso:

—Astiz nire ama laztanduko dot?

Il-zorijan dago; arin ezpa-nua

eztot laztanduko illotzik baño.

Arin, nire zaldi, nire zaldi zuri,

nire zaldi bizkor, arin laroinka!

Il-zorijan yagok neu-ama mattia;

osakija yaukat. Arin! Aurrera!

Bat-batez bidian, esker-eskumatik,

mamu gelgarrijak agirtzen dira;

neskatil lirañak, edurrez jantzitta,

gozo-samurkiro diñotsoenak:

—Nor zaldiz, ain arin, basuaz aurrera?

Itxon, gaste zoro, geldi ta, atzera!

Gu gara basoko mattagarri onak

zoruna zuretzat dakartzugunak.

Eregu laztanak zuretzako doguz;

gure mattalia ixango zara.

—Il-zorijan dago neu-ama mattia;

osakija daukot. Arin! Aurrera!

Bat-batez bidian, esker-eskumatik,

mamu gelgarrijak agirtzen dira;

baso-jaunak dira, ulez estalduta;

makilla gogorra dabe eskubetan.

—Nor zaldiz, ain arin, basuaz aurrera?

Itxon, gaste zoro, geldi ta, atzera!

Oyanon gu gara baso-jaun altsubak;

ala dakartzugu; erdu gugana.

Geurekin oyanon jaun ixango zara;

zu baxen altsurik ezta basuan.

—Il-zorijan dago neu-ama mattia;

osakija daukot. Arin! Aurrera!

Bat-batez bidian, esker-eskumatik,

mamu gelgarrijak agirtzen dira;

zorgin itxusijak, itxuski-gañian,

betoker, agin-ez, makurtu, zarrak.

—Nor zaldiz, ain arin, basuaz aurrera?

Itxon, gaste zoro, geldi ta, atzera!

Gu gara zorgiñak; itxusi ixan-arren

asko dagikegu; erdu gugana.

Ludiko gixonik pozena zarake,

gura-dozun aña daukakezu-ta.

—Il-zorijan dago neu-ama mattia;

osakija daukot. Arin! Aurrera!

Arin, nire zaldi, nire zaldi zuri,

nire zaldi bizkor, arin laroinka!

Itz atzipekorroi belarrijak itxi

astiz elduteko ameagana.

                * * *

Zaldija laroinka, basuaz aurrera,

mamu gelgarrijak atzez itxitta,

gaste epebakua ameaganaño,

bijotza-taupaka, laster eldu zan.

Astiz! Il-zorijan eguan amea;

semiak mattero mosu-ein eutsan,

mosubaz bixitza barriz emon eutsan,

ta bijok betiko zoruntsu dira.