BI ODEI GORRIREN GISA

 

Hotzikara zerion, ikara,

jauregiko harri latz, harriari.

 

Gure eskuak elkarren bila

bi odei gorriren gisa

bi txoriren jostaldi isila.

Gure eskuak elkarren bila.

 

Diskurtsoen oihartzuna ormetan

jauregiko istorio zaharretan.

 

Amodio ikara zerion

zure esku luzatuari.

Jendearen atzetik hurbildu

nuen nirea, desiratsu...

eta biok urtu ginen

zorion laburraren lakuan.

 

Lagun ikara zerion harriari

jauregiko diskurtsoen gainetik

... eta poza,

gure eskuen katea ikustean.

 

Inor ez zen konturatu

Inork ez gintuen begiztatu.