XOKOTIK

 

Zahartzaroko ibilaldian

ilusioen haizerrota mugitzen

hezurrak gai ez direnean,

aintziraren uretan —makila lekuko—

ikusi dut gaztetako musu ezkutatia,

ezpain erdibituetan zurubil dantzari bailitzen.

 

Urtez urte euriak hezi ditu nire ezpainak

udaberriko amodio hitzen ondotik...

Uretan, ur baretan, haur baten aurpegiak,

kantu isil batetik ihesitako nota bailitzen,

gardentasuna dio lurrundu —makilaren pozetan—

nire gaztetako musuari, eta erantzi dit

soinetik oroipenen zapia, milatan birjosia.

 

Zahartzaroko ibilaldian

eskuaren dardaizea baino, makila gogorrago...

Aintziraren hegaletik, urteen ezpainen xokotik

nabil, haur batek lapurtu musua ezin jasorik.

 

Azken pausoetan, birjosi zapiaren haritxoetan,

ilobaren irriaren ukitua sentitu dut

eta musu ezkutatia, ametsezkoa,

uretan, zahartzaroko ibilaldi neketsuan

galdu da.