MUSUA ETA HOTZA

 

Zein errexa den nahastea

musua eta hotza.

Gauaren azken keinua galdu egin da

izara zurixkaren tolesturetan.

Eta bai luzea zela atzoko musua

arratsa desioaren laino garden, argitsuetan,

erantzi zenez geroztik.

 

Eta bai luzea gaurko hotza.

Hauspoa hautsi zaio txori gautiarrari,

bakartiarrari, kantuaren erditik;

mila hautsatan, izotz milatan,

birrindu zaio nire aurrean.

Gauaren azken keinua bezala.

Eta bai luzea gaurko hotza.

Oroipenetan kulunkatuz jaio baitzen

bakardaderik sakonena.

 

Iztarrean sentitu nuen zure eskua

elur beltzaran jasa

epel, ferekatia.

Eta bai luzea zela atzoko musua

gorputzaren ilun-gorria desioz jantzi ondoren.

 

Eta bai luzea gaurko hotza

izara zurixkaren tolesturetan,

gauaren azken keinua galdu denean

oroipenak kulunkatzean

bakardadean.

 

Eta bai luzeak... musua eta hotza.