Beldur naiz
Patxi Ezkiaga

Euskaltzaindia / BBK, 1985

 

 

SI, CHICA!

 

«Sí, chica», zutaz pentsatzen dut,

iraganaren kirats goxo eta fetidoa

dariozun horretaz;

amets inbertituen hilerrian usteltzen

ari zaren Chica Nostalgiaz, zutaz.

Heriotza naturalez hil nahi ez duzun

satinezko mamu beltza,

emakumetasun ahul eta alferrikakoan

loratu den paper merketako

krabelina,

arraultza ustelduaren

txuria. Zutaz.

Zutasuna ukatu eta

«NORA» dudakor guztiak baztertuz

zugandik gero eta urrunago zaramatzan

bide ezagun eta zabaletik

abiatu zaren horretaz. Zutaz.

Hilobietako pake eraile eta ziurrean

ohea eta maitalea

ezarri duzun horretaz.

Tontoak erregetzaz koroiatzen dituzten

herri arrotz eta totel bateko

biztanle zaren horretaz. Zutaz.

Zizareen eboluzioko gurdira

igo eta ezerezaren lasaitasuna

atsegin duzun «chica» horretaz.

NESKA izatea a la m... bidali duzun

horretaz. Zutaz.

«Sí, chica», kaka zuretzat.

 

Beldur naiz
Patxi Ezkiaga

Euskaltzaindia / BBK, 1985