ASKI

 

Aski hondamenaren igarleak

ahoa zabalik

ukabila zutik

ai, ai, ai ene!

ai hi, putaseme!

ene, jota gaude!

begirada iluna besterik

ez dutenak.

 

Aski heriotzaren getariak,

ezkutaturik,

patrikak beterik

ostiaka ta mekauenka

besteren ilusioak

lapurtuak

konsideratzen dituzten

panfletariak!

 

Aski esperantzaren ebasleak,

mugaturik

lur eta harri

bakarrik garelakoan

begiurdin guztiak

ilundu nahi dituzten

hiltzaile madarikatu

ixilak!

 

Aski engainatuen askatzaileak!

ez besteren argirik

berea soilik

onartzen ez duten

fenomenoak!

eritzi bakarren,

zapalduen ahotsaren

fabrikanteak!

 

Aski herriaren gidariak!

artalderik

gabe, lurrik

jorratu gabe,

artzain eta laborari

ororen oihu ta oihartzun

bakarra direla

uste dutenak!