1938 ABERRI EGUNA

Oi, nere bihotzeko Sort-Herri gaixoa,

        Zenbat zaitut maite!

Herri minez herrian hiltzerat banoa...

Gau egunez deraukat zu baitan gogoa.

        Geiago ez naite

Bizi atsegabetan. Zato Herioa!

                * * *

Donibane ikusten zaitut gain huntarik

        Itsas bazterrean:

Eresiak doatzi ezkil orotarik:

«Gaur Pazko dugu, Pazko», diote gorarik;

        Poza bihotzean

Pitzarazten baitautet, bazterrak beterik.

Zuk duzu diotenaz aurten ikusiko

        Aberri Eguna...

Itsaso ñabarrari uhainak janeko

Bozkarioz jauzteka betan ari zaizko;

        Jauntzi ederrena

Zeruari egungo Jaunak eman dako.

Hunaraino pestaren azantzak hel diten,

        Ixil, itsasoa!

Ez dut abestirik, ez oihurik entzuten...

Gaur Aberri Eguna ez deia egiten?...

        Ba, bainan gaurkoa,

Lehengoa bezala ez da, ez izaiten.

Aberri Egunaren urrungo azantza

        Entzun dut bet betan.

Larrungo gibeletik, (Oi, zer pesta beltza!)

Jin zaut Euskotar odol beroaren botza...

        Luzaz ametsetan

Egotu naiz orduan, ilunik bihotza.

Asko ikusten ditut, han gudurat gaki

        Eder eta sano;

Tiroen artetikan kantatuz ibilki...

Zer kar saindua duten munduak balaki!

        Nola hiltzeraino

Kurutze ikurrinak dituzten atxiki!

Orai lurrari odol eta ke dario...

        Oi, Herri gaixoa!

Haur emaztek etxeri diote adio.

Aitari soldadoak oldartu zaizkio

        «Gora Jaun Goikoa

Eta gora Euskadi», erortzean dio

Bai, Aberri Eguna ikusi dut aurten

        Nigar egitean:

Intzireak baizikan ez ziren entzuten.

Zorigaitzezko pesta abertzalek zuten:

        Kar saindu berean,

Herriari odola eskaintzen zioten.

Lehen abertzaleak hedatuz zoazin

        Euskadi guzira;

Ortzirale saindu bat gero zaiote jin;

Hemen geienek dute «tolle» oihu egin...

        Gure dei suharra

Jauna, entzun zerutik Pazko etor dadin!

                * * *

Oi nere bihotzeko Sort-Herri gaixoa

        Zenbat zaitut maite!

Herri minez herrian hiltzerat banoa...

Gau egunez deraukat zu baitan gogoa.

        Oi, urrikal zaite

Zure Euskal-Herriaz zerutik, Jainkoa!

Donibanen: 38'eko Pazko biharamunean