OBRERO XAHARRA

 

Eguneroko goizeko zortzitan

betiko autobusean herstuturik

plastikozko poltsean hamarretakoa eta laneko arropak

bizkarrean zatoa!

 

Eskuak latz

kopeta ximur

begiak gogor

bizarra gaizki egina

kalpar zikina

zapel txiki baten azpian

obrero xaharra lanera doa!

 

Itxaropenaren egoak

eguneroko lanaren minbiziak

ahortu zizkion.

 

Sinismena apaiz batek ostu zion

elkartasuna lagun salatzaile batek

jendez herstuturik autobusean

—bizikletarako ez da gauza—

bakar bakarrik oroitzen da

inguruko inor ez zaiola axolik

eguerdi aldean bizkar ezurreko mina jarriko zaiola

eta lanerako gauza ez denean...

...hobe lehenbaitlehen bukatu!

Mundua gero eta hobeagoa izanen dela

semea Barzelonara joan zela

emaztea gangrenaz hil zela...

 

«Hurrengo geldialdian jatsi beharra nauk

eta atzera joan beharko nauk».

 

«Arren mesedez,

arren mesedez».