Aiodi herriko kantak
Patxi Ezkiaga

Gipuzkoako Aurrezki Kutxa, 1986

 

 

Ezin

 

Ezin atzoaz birmindu,

kateari itsatsi eta

itsaskaioen txillioek

egunsentitu duten ainguraren

lotura eten.

 

Ezin, beraz,

behin urdinez amestutako geroaz

aspertu;

ezin

malekoieko biretan zartatutako

soka untzadunean

sinestu;

izatearen mugazia guztiak

egunen batean horbelaren

erorketa kantan geratu eta

erroak hegoak zabalduz

udaberriko haize epelaren

eurijasaren ondorengoko ostadarrean

kolore oroz tintatuko direla

espero baitut.

 

Ezin, beraz, atzoaz birmindu,

atea itsi, krisketea bota

eta, litekena ukatuz,

pertsiana eroriaren

etsipenezko ohean etzan

direnen antza

tragediaz horditu.

 

Aiodi herriko kantak
Patxi Ezkiaga

Gipuzkoako Aurrezki Kutxa, 1986