Pobreziaz

 

Pobreziaren kiratsak

inguratu, suntsitu eta atxilotzen zaitunean

alferrik duzu dutxa hestuko

presiozko itutearen eztenkada

alferrik aftershave emearen

usain sarkoia...

alferrik, pobreziak hatzaparretan

harrapatzen zaitunean.

 

Pobreziaren zikinak

arropa aldaezin izerditua

izter ta bularretan atxikitzen dizunean

alferrik zaizu, lagun, metro tuneleko

kitarra negartiaren nota,

alferrik kale ertzeko esku luzatua,

alferrik eliz atariko txanponaren

kandela errea...

alferrik pobreziak esperantza ezan

murgiltzen zaitunean.

 

Pobreziaren gorriak

zuritu, garbitu eta tintatzen zaitunean

alferrik zaizu miss Universoren ditien

irrifar deigarria,

alferrik iragarkitako ezpain beteen

keinu tentalaria,

alferrik pulpitu gaineko apaizaren

«zorioneko»en zoriona...

alferrik, pobreziak desilusio saltsan

itotzen zaitunean.

 

Pobreziaren magiak

galtzaileen tunelean sartzen zaitunean

alferrik zaizu izar hautsen

argi printza iheskorra...

alferrik astiaren pañuelopeko

ilusiozko uxoa,

alferrik nylonezko pantyen

ukimen lizuna...

alferrik, pobreziak amets ezinen erreinuko errege

koroatzen zaitunean.