Sastarriko aintziraren ertzetan

 

Eta ez genuen zuririk

eskutan, ez genuen

kriseilu zahar baten

izpi izutirik

lurreko karatxoan, ez genuen

poxpolo xumearen garrik

kobako aire bakartian,

ez genuen sarrerako

zirrikituetatik abiatutako

noizbehinkako eguzki

jolastaria baizik

saltoka zure begi gardenetan,

hamazazpi urtetako

lilluraren harridura

anai zahar honen esku

hestutuetako izerdi miketzaren

gusto hezean,

mingaina karbonato kalzikoaren

ezpain lizunetan,

amodio harribiratuaren

hoztasun freskoan,

mendetako ispiliku, mendabelar,

horbel, ote eta txiribiten

arima xukatutako Aralarreko uraren

itute hilezkorra

Sastarriko karearen sabelean.