Sonetoa 7

 

Berrogei urte ditut ta amodioak

berriro pertsianak hedatu dizkit

ene ilusioaren gaueko etxean

lilurazko magia triste hau guztiz

 

ihatua, egunsentiko karnabak

ihintzetan itoak, soinu ta hitz

gabeko F.M.ko irrati mutuak

lau haizetara melodiak eskainiz

 

melankolia ezako jazz pobreak

sendaezineko sakoneraren min

hotz ta herio itzal zitalez joak

 

gaudenontzat nonbait asmatu nahiz

gure azken bidaiarako beste ertz bat,

geroan badaezpada ere eta urruti.