Bizitza nola badoan
Itxaro Borda
Maiatz, Uhargi 1, 1984ko agorrila

HUTS SENTIMENTAL

                (1981)

Huts sentimental hontan, bihotzak sortuan,

baldin ikusten badut argi bat portuan

barkoa utz dezaket ondartzen mortuan.

Eta atzo hautsien zatitxoak bilduz,

esperantz berrietan emeki murgilduz,

argi horri eskale banator, hurbilduz!

Naramala bizitza gazien lasterrak,

nola haur denboretan ziren supazterrak

dirudit berotuak direla bazterrak...

Kaietan egoiteko, ai banintz xirlinga,

baneza pausa leku bat betiko finka

portuko argi ahul hau nezake tinka!

Bainan argiak ez du neretzat argitzen,

ez ditake iluna hain goizik garbitzen,

ez da neregatikan untzirik partitzen.

Hutsari narraikola gauen orainean,

hiltzera utziz desir kiretsak zainean,

bakarrikan banoa itsaso gainean...

Bizitza nola badoan
Itxaro Borda
Maiatz, Uhargi 1, 1984ko agorrila