Bizitza nola badoan
Itxaro Borda

Maiatz, Uhargi 1, 1984ko agorrila

 

NERE HERRIKO ESKOLAN

                (1979)

 

Nere eskolan enkre briolina

eta kreda xurien errautsa,

nere eskolan larrazkenetako

haize hegoek altxatu hautsa!

 

Nere eskolan taulazko zoletan

sagu ttikiren pasai ziloak,

nere eskolan eguzki argitan

armiarmak ehaindu biloak!

 

Nere eskolan preau umilean

mutil neskak nahas kaniketan,

nere eskolan erramutzearen

pean hosto legortuak metan!

 

Nere eskolan liburu ederrak

larru gorriz urrez beztituak,

nere eskolan suontziak bero

hotzak ez direno eztituak!

 

Nere eskolan errintsa errints

baina gozo arrosen hatsa,

nere eskolan Mailuxak emaiten

bere aihenetikan mahatsa!

 

Nere eskolan euskara zilegi

frantsesa ere behar ikasi,

nere eskolan negar eta irri

orain naizena egiten hasi!

 

 

Bizitza nola badoan
Itxaro Borda

Maiatz, Uhargi 1, 1984ko agorrila