ZORIONA

        Gau ilunari

        zerua izarretan da.

        Itzalpetan gaindi

        eskuz-esku dabiltzan

        maiteari

        xoriño bat bada

        bihotzetik bihotzera

        kantari.

        Xoragarri

        bihotzaren eleak

        maiteari.

        Ez du goxoagorik

        bizi guziak

        ametsetan baizik.

        Munduko solas ederrenak

        maiten bihotzetan dagotzi

        betidanik

        ehortzirik

        maiteak maiteari erranak.

        Maitek bakarrik dakite

        gordatzen

        gizon samurren begietarik

        ixil-ixila

        zoriona.

        Itsasoa kexu

        ta zerua ilun

        maiteak uros izanen dira

        beti

        maiten bihotzetan baita

        zoriona.

        «Irria» izeneko beste poema bat ere bazuen portugesetik itzulia antza. Hemen aldatzen dugu:

        IRRIA

        Irri batek lan guti, ondorio ainitz,

        Ukailea du aberasten, emailea biluzi gabe.

        Laster iragana, betikotz emana,

        Ez da aski aberatsik, gabe bizitzeko,

        Nehor aski pobre, eman ahal gabe gertatzeko.

        Irri bat akituaren eztigarri, etsituaren bihotz altxagarria,

        Dolutan denaren goxagarri,

        Nahi gabe guzien sendagailua

        Ez ditake eros, ez mailega, ez eta ebats.

        Emaitean du hartzen bere balioa.

        —Hartze zinuen irriñoa ez dautzute eman, emozute zurea.

        Irri egiten ez dakiena, irri beharretan beti.

        Zure irriak zonbat irri ditu egun sorrarazi?

        Irri horiek dute salatuko zonbat bozkario, zorion, goxotasun,

        Kuraia eta fidantzia duten sor arazi: horiek baitira frangotan

        Obra miresgarrienen eta egitate ederrenen haziak.

        Zure irriak bizi berri bat sor araz dezake,

        Esperantza eta kuraia eman ditzazke, eroriak, lehertuak,

                [akituak, tentatuak edo etsituak ziren bihotzeri.

        Zure irriak fedearen pindarra jauts araz dezake.

        Zure irriak bekatorosa Jainko bidean sar araz dezake.

        Irri ere Jainkoari...

        Irri Jainkoari, bihotzetik onartuz Harek bizian igorri guziak,

        Eta egun batez ikusten ahalko duzu Kristoren begitartea

        irriz zuri so eternitate guziko.

                        [E.B. Portugesetik]