BAIMENA

        Gure Aita Aintzindariaren manuz irakurri eta etsaminatu dugu Aita Bazilio Joannateguyk argitarat eman duen liburu hau Sainduen Bizitzea. Ez dugu aurkhitu liburu huntan deusere Fede katolikoaren kontra denik; aitzitik uste dugu ongi handia eginen diotela irakurtuko dutenei.

Bastidako gure Abadian, martxoaren 1ean 1890ean

Aita AGUSTIN BASTRES

Aita PIERRE-DAMIEN-LAPEYRE

BAIMENA

        Guk, diosesako Bikario Kapitularak, ikhusi ondoan Aita Agostin Bastres, Beneditanoen Jaun Priore ohoragarriak eta Aita Damien Lapeyrek eman dioten aprobazionea, gogotik onesten dugu argitarat eman dadin, Aita Bazilio Joannateguy, Beneditanoak euskaraz ezarri duen Sainduen Bizitzea; ez baita irakurtze salbagarriagorik eta arimen berthutean aintzinarazteko gaiago denik, nola Sainduen exenplu ederren ikhustea eta hekien gogoan atxikitzea. Gutiziatzeko litake etxe guzietan bat izan dezaten Euskaldunek; eta arratsetan, elkharrekin bilduak direnean familiako menbro guziak, irakur dadin Saindu baten bizitzearen parthe bederen.

Bajonan emana, martxoaren 3an 1890an

INCHAUSPE, Bikario Kapitulara

MURDE INTXAUSPE, BIKARIO JENERALARI

Bastidako Abadian, martxoaren 1ean 1890an

        Eskual-Herrian zerbeit dakiten guziek aditua eta jakina dute zein khartsuki nahi zinuken Eskualdunen fedea bethi hazkar egon dadin, Eskualdunak gero-eta-gehiago saindu ditezen.

        Nik ere xede bera nuen egin nuenean nere lehen liburua Ehun-bat Sainduen Bizitzea, eta gero ere bai lotu nintzenean orai agertzera dohan liburu berriaren egiteari.

        Halarik ere zenbat aldiz, bere lanak lotsatua, ez naiz gogoetan jarri? Eta izan diteke ez nuela deusik eginen, ezpanintz orhoitu adiskide argitu batzuei eta bertzei eta bereziki zuri entzunikako solhas on zenbeitez.

        Ezta beraz sobera eskain dezautzudan.

        Onets ezazu, othoi, nere bizi guzian zure alderat izanen ditudan ezagutzaren eta ikustatearen seinaletzat.

        Hartzen duzularik zure gerizan, errexkiago hedatuko da orai, Apezpiku gabe garen huntan, diosesaren buru zarelarik, zure meneko dituzun Eskualdunen artean; eta horrela on gehiago eginen diote Aita Agustin Bastres, gure Abadiako Aintzindari errespetagarriaren manuz, zenbeit aldiz predikari gaituzten arima Jainkotiarrei.

        Liburu hunek izanen ote du, bere ondotik, bertze lagunik? Eztakit; denborak erranen du: Eskualdunek zer begitarte egiten dioten.

        Dena-dela, Jainko Jaunak iduk zaitzauzkula luzez orai arte zinuen karguan, egin ahal dezozun gero-eta on gehiago gure Eskual-Herri maiteari.

Osorik zure meneko den zerbitzari umila,

A. BAZILIO JOANNATEGUY,

O.S.B.

EUSKALDUNEI BI HITZ

        Lehenago 1876an agerrarazi nuen Ehun-bat sainduen bizitzeak atsegin egin zautzuela erakutsi zinuten ederki, erosi zinituztenaz geroz bi urtherik barnean orduan inprimarazi nituen bi milak.

        Handik goiti banituen bethi eta bethi galdeak ian ez ote nuen gehiago. Noizbeit hasi naiz berriz ere lanean, eta egin dut bertze liburu bat berri-berria, eta nere ustez lehen hura baino eskuara errexagoan.

        Ezen orduz geroz ibili naiz herriz-herri, eta eman dut ahalaz kontu nola mintzo zineten zuen artean; irakurtu ditut ere beren eskuara ederraren gatik guziz aipatuak diren liburu batzu; eta hortakotz iduritzen zait frantsesik eztakitenak bezalatsu mintzo naizela.

        Saindu haukien bizitzean aurkhitu badut Jainkoak agindu diotela zenbeit grazia, zenbeit fabore hekien alderat debozione izanen dutenei, edo hekien ohoratzeko othoitz zerbeit eginen dutenei, agintza hek ezagutarazi ditut bederen gehienetan; hargatik ez nuke nahi nihork eratxik dezoten Elizak onesten duen baino sineste gehiago.

        Eta orai, Eskualdun maiteak, erranen darotzuet har detzatzuen begien aintzinean, eta atxik gogoan liburu huntako Sainduen etsenpluak. Hori izanen da zuentzat irakaspen salbagarri bat, bertutea pratikaraziko dautzuena eta sainduaraziko zaituztena, eta nik baduket nere lanarentzat bilhatzen dudan sari guzia.

A. BAZILIO