MARI PETRALIN

 

Etxeko ezkaratzean entzun nituen

zure lehenengo garraxiak nireak

eskilarak izan ziren

malkoen lehen ur-jauziak

geureak

supazterra bilatu zenuen berehala

hala nago bertatik ezin urrundurik

 

etxeko ezkaratzean jolasten dituzu

bitxilore eta mari-lokak

galaxiak loratzen ditut

eskilaretatik begiratzen zaitudanean

aldabak jotzen du gure ernean

sukaldean gaudenean

 

Zuk ez dakizu ezer

gerraren horroreaz

ni heldu naute

beldurraren zomorroek

eta azalpen silabak urratzen ditut

etsipenak inoiz harrapa ez gaitzan.

 

Heriotza dakarte beraiekin

jendea kabitzen ez zaien suntsitzaileek

gutxi batzuk zelatan daude

hatz seinalatzaileen jauregietan.

 

Zainduko zaitut

Mari Petralin.