Zati bat hautsi zen

musikaren laguntzaz

begirada hura bitartekari izanik,

nolanahitasunezko goibeldura otzanak

ikusle pasiboarena egiten zuela

zartatu zen zipriztina

zati hura hautsi orduko.

 

Baina sorbeltza berriro ere

iazko eta betiko eliz zuloan

habia egiten saiatuko da,

aldakortasunaren legea erabiliz

berau bertan gaindituz

soina zaharrez jantziko du

arrastiri ohiturazkoa.

 

Hots bat kraskatu da

hots bat murgildu

maiatzako arrats berantiarrean

apo-hontzaren aiuri erritmikoa

tarteka nahastuz haize hotzen oroimenean,

bibradura irristakorra denborarekin

ezarian harilkatzen den heinean.

 

Paduran barrena izkutatuz

lezken astindua bisaian sentitu

zelatariaren grina azaleraziz,

harrapakinaren gogoeten bila

zerurako eskailerak alferrik eskatzen

irrintzi gorriaren zain, aspertuta.

Zoaz, zaude, nahasmenean, zabunka nadin.

 

Laztan bat aireratuko da

nostalgiaren itzala bilatuaz,

zapi zuriaren intzirinak enoratu

orduen urduritasuna zapaldu

oraina irekiko baitzaizu

gauaren ateetan

laztan hura gogoratuko dugunean.