Itxaroaldi kraskatuaz

diraut artean

hotzean

berotasunezko etorreraren ametsarekin

etsituta

egunsenti argiek

odolberritzen ez nautelarik.

Konturatze ankerrak

errealitatea erakutsi zidanean

amore eman nuen,

ezin dut zurekin egon

nire murruen joskurak

arrailtzen doaz

zureganatzerakoan,

baina badakit

ez duela merezi

halakoetan

ene gogoeten zurrunbiloak

erabiltzea,

izan ere

arrailduren hutsuneak

modu honetan betetzen baitira,

horrela

arraildura hedatuz

murruen joskurak zabalduz

hutsunearen betetze honek

hutsunea bera handiagotzen duela

ziurtatuz.

Eta ziurtasun honek

murruen arraildurak diren ziurgabetasun-esparrua

niregan hedatzen du

hondo sakonetara.