Gaueko trenen ulurik

              aditzen ez

              hemendik

ibar sakonetan dautza

goiz euritsuak ibiturik.

 

                                         ta artotza an dago,

                                         ez ots, ez ixil...

 

Logopedia latza baita

bihotzeko koadernoak

eta burmuineko apalak

                  zitaz hustea.

 

Irribarre izoztua

itxaropenaren alozetan

                            zimurtua eta

Itaka beti eskurakizun

Parkek diruten eta

                           dirauten

                 mihise geldian.

Helgaitza

                 hezgaitza izaki

                 eta hezgaitza den

                                          oro eder.

Nork bere jainkoei

                         dena den

                         dagielarik men

              amets sukartsuen

                                          erresumaren

                                                       atalasean:

bil ditzagun mahatsak

meta dezagun maiatza

urrian                       bada                            ere.

 

 

 

 

Hitzak kare-harri

                          uretan hartzituak.

Hitzak labar-harri

                           heriora amilduak.

Hitzak legar-harri

                            negar-laborri ororen

                                        ibai-ezpondetan

                                                     pausatuak.

Hitzak solas-harri

                            ur gaineko bitsetan

                                              sorgin-orratz

                                              xomorro-jale

Hitzak aingura-harri

                         ur azpiko isletan

                                               izu-azpilduren

                                               gordagi-ikerle.

              Hitzak       hitz.

                                                    Nola nahi ere.