Eta gu gau-bideari garraizkio

atetzar hondatuetan kolpatuz

                     oroi gabeko orube hutsetan

                           areto mortuetan

            keinu ulergaitzak zantzutuz

                                                    malko-lanpara herdoil-

                                                                               duetan

             izara kendutako koadro des-

                                       estalietan

                           arbasoen begitarte arraiak

                                                                    berpiztuz

                                                              erdi itzalean

 

eta estropozo egiten dugu

                            han berriki izana datekeen

                                             clochard-en batek

                                             salaren erdian

                                     utzi garagardo-

                                                         botila

                                                                  hustuekin

               edangoituen pausajeaz

                              abiatzen garelarik

                                                ataka larritik

                          elur oinatzik gaberantz

                                                   gauaren         erdian.

 

 

 

 

Hilargi-limoi laurdenkada hortxe

                    leihoaren parez pare

                 zeru altuko lore zurbil

                                                    amildua

           mendi eta mundu

                                     ilun isilen

                                                      gainean

 

                                            kulunkari.

 

                         Ibar hertsiko otso-uluen

                                               seaska-kantu

            gure ezpain odoltzeraino haginkatuetatik

                          jalgi ezinik itotzen diren

                                                    izu-oihuen

                                                             testigu mutu.

 

                                       Ahal bazina ukendu!

 

(De profundis clamavi)...

                                ...

                                ...