UR GAINEKO BITSETAN. DOBLA ETA FINI

         (Praeteritio ad urbem)

 

Poema bat idatzi gogo nizuen

                   basuraren erresuma honetako

                           bele zilbor-gantzadun

                           oilar harro arranditsu

                   torero txaparro

                                   barrabil-hizkeradun

                   zozketa-banatzaile gorbatadun

                                   burusoil kalakari

                            garbikari-saltzaile

                                   pulkro itxurako

                                                       ustel kirastun

                                                guztien gainean.

 

Baina ez du merezi.

                   Su artifizialezko hiri desesperatu honetan ez.

             Gehienaz ere kristalezko gong bat jarri behar nuke

                                                        lerro hauetan

                    zarata handiegirik gabe leher daitezen

                               liturgia nerabeak oro

                                         maskor soinudun txalo zaparrada

                                                         g o a t a z k o a k

Betti Davis eta Lana Turner guztien

                                         elefante-hilobi

                                         bihurtu diren

                                         hiri bolizkoetan.

 

                                         Zeren gainera basura hitzak

                                                          ihintza esan nahi baitu

                                                  Itsas ondo (h)an...

Eta nik ere

                     «loreak udan intza bezela»

                                eta abar. Da capo, Hollywood:

                                                                        Salve Regina.