Eten dezadan jolasa.

                                     Ezaba dezadan anabasa.

Malkoz ikuz dezadan ikus ezina.

 

              Bada garaia

                           behingoz

                                        okuntza elgetuak,

                                        Jubal jabaldunak,

                                        arrabita arrabiatuak,

                                        f-rik gabeko Kafkak oro

                                                             goitika ditzadan.

 

Lartaun-Txikiak

                 odola dariela

                                  ari baitira oihuka

                                  sarrakioen lehotzetan

                                  eta soilki

                                      haien «sabelean-sabelean!»

                                      aditzen baita

                                      Errez-ilgo mendi-mazela

                                                               langartuetan.

 

Antigualeko irribarreak

hatzazal erauzien hezurkondo

                eta garraxi

                eta herioaren oreinak

                             begietan jauzkari

                barne-hegalak

                              ezti-abarasken beazun

                                           betierekoan tupust...

 

 

 

                           Amodio gandutuen

                           gomuta soraioak

                           odol-zipristin lekatsu

                  ispilu           hautsi      orotan

     eta baso-sakonak

                                              oihartzun

                                                            eta

                                 ezpatak bihotzean

                                                            erantzun.