NATURAREN OLDARRA

 

Tonu ilun distiratsuen sinfonia:

             «belar gaineko otordu» barroko baten

                                              eskenategi.

             Errepara

                        ninfa rubenstarrei

                                           dantzan

                                           koadroaren ezker

                                                                   bazterrean.

 

                         Baina gutxienekoa da:

                                   basoaren argi-ilun astuna,

                                   zuhaitzen arkitektura perfektoa,

                                   hostroen antzerakotasun iraingarria,

                                   urrun-mendiko eguzki etzanaren

                                   argitasun zizkolatsua...

 

                          Horrek du axola.

                                              Eta uhaitzaren oldarrak

                                              amildegi malkartsuan behera

                                              ibarrean hedatuz doazen

                                              uholde ugarien gizengarri.

 

                          Horrek du garrantzia.