III. ZERU-ARGI

                Tunc autem facie ad faciem.

                        (I. Cor. XIII-12)

Irugarren musua

Iltzen naizeneko

ARGI, tai bage, begi

ona galtzeneko.

Eskuek argi-adar

dator Iesukristo

ta Aren dirdaiak, denik

beltzena aizatuko.

(Garbi-bearrik bage

ager al natzaizu

lurrean egaririk

oinaze-lorren su!)

Musu orren argiak

biur naza ispilu,

gandu-zantzurik bage

zakidan agertu.

Argi orren indarrez

gaituko da Adimen,

berez ezin bai luke

Iaungoikorik eden.

Aurpegiz ikusko du

denez, ez dena den.

Laino, gandu ta susmo

aldegin dute emen.

Agur, fede, lurrean

nuen itsu-mutil;

zuri esker leizean

ez nun egin amil.

Itzak beude, Iaunagan

naimena zadan bil,

Au baita Argi betiko:

Ontan nadin murgil.

Atea iotzen ez dugu lanik,

dena den dago zabala;

etxe ontako iende noblea

Iaunak bedeika dezala.