MARIÑELAREN KONTRA-PASA

Mariñela,

Zuk bethi ezin-egona!

Ohetako,

Itsaso gazi urdina!

Teilatutzat,

Zeruko hedoi arina!

Begietan

Izarren argi gordina!

Kulunkari,

Beladun untzi sorgina!

        Errepika

Hargatik, hargatik,

Ez gal gogotik,

Zure goait, zure goait

Dagola norbait,

Itsas-hegitik!

Mariñela

Zuk laket aize bizia!

Ez astio

Uhainen jantza-jauzia!

Bainan nunbait

Lore bat, dena grazia,

Begi urdin,

Sudur motx, ilhe hartzia,

Zure beha

Badago urthe guzia...

        Errepika

Geroztik, geroztik,

Ez gal gogotik,

Zure goait, zure goait

Dagola norbait,

Itsas-hegitik.

Mariñela,

Lanjerra duzu ikasi:

Zonbat neska

Hor gaindi ere ikusi,

Bakar batzu

Ez baitzitzaitzun itsusi:

Ba ahal zira

Hetarik eman ihesi

Ez baitautzu

Bihotza nehork ebatsi!

        Errepika

Nehundik, nehundik,

Ez gal gogotik,

Zure goait, zure goait

Dagola norbait,

Itsas-hegitik.