ORBANGEARI

Sortu ziñaden egun onetan

Urbildutzen naiz zugana

Orban gabeko Neskuts maitatzen

Biotzetik zaitudana;

Nere itxaropen bakarra izanik,

Altsua ta samurra dana,

Egokiago nori azaldu

Nezaioke nere lana?

Zotiñez nagon tokitik goruntz

Zuzentzen ditut begiak,

Zuzentzen dizkit daukazun alki

Diztikorraren argiak;

Uxatu bada, goizeko izarra,

Nere illuntasun guztiak,

Egun onetan poztu ditezen

Goiak bezelaxe biak.

Etzera gure zorionean

Ludi gaiztoan sortua,

Arantza zorrotz artean sortzen

Dan legez lore gozua?

Atsekabeaz beteta dauden

Guztien pozkor osua,

Erruki zaitez nizaz ta neri

Luzatu zure besua.

Aintza ta lorez inguratuta

Ama maitea ikusirik

Biotza zabal jarritzen didan

Alaitasuna daukat nik;

Aztutzen zaizkit ezbear danak,

Ez det orduan zotiñik,

Ta iduritzen zait irten nuala

Itun neunkan espetxetik.

Aintza gaur zuri, Goiko Jaunaren

Alaba kutun-kutuna,

Ludiko gauza guztiak baño

Geiago maite zaituna;

Gotzon guztiak lilluraturik

Dauzkazun edertasuna,

Aulkirik gaillen ederrenian

Zauden gure Bakalduna.

Aintza zuretzat zeradelako

Guretzat aintzik onena,

Diguzulako biurtu garbi

Galdu genduan omena;

Gora guraso zarren buruak,

Poztu zaitez aitalena,

Begira lore zugaitz zarretik

Eze ta lirain irtena.

Lore benetan ederra, bere

Likurt indartsu gozua

Dagon tokitik asi ta gero

Nunai banatzen dijua;

Atsegintzen du ludia, baita

Atsegintzen du zerua.

Onetsi bedi Neskuts orbange

Zorionean sortua!

Inguru dana, bazter osoa

Lokatz zikiñez eta arri

Gogorrez emen luze ta zabal

Ikusten degula sarri,

Bide bigun bat bearrekoa

Genduan nun oñak jarri,

Baita bear zan ere lore bat

Nori begiak ezarri.

Aintza bai zuri ludiko lore

Danontzat maitagarria,

Lore bat baño egokiago

Zerana loretegia;

Ta almen guztiaz aintzatu bedi,

O Neskuts orbangabia,

Edertasunak orrela zugan

Batu zituan Jabia.

Ez aztu baña zeruan egon

Arren zerala gutarra,

Egun batean zala zurea

Orain daukagun ibarra;

T'entzun samurki, orbange sortu

Zeraden Neskuts bakarra,

Entzun gaur dar-dar dagon kolkotik

Dijuakizun negarra.