NIRE ESNATZEA

 

Nork esan du, horren zitalki,

Euskadi nirea ez dela?

Nork esan du hain asmo gaiztoz

Euskadirena ez naizela?

 

Nire bihotza

lotan zegoen,

nork esnaturik

ez zeukala;

bere barruko

suaren behar

Euskadi zenik

ez zekiela.

 

Lotan zegoen

nire bihotza,

minez zegoela

Aberria...

lo zegoelako

ez zuen nabaritzen

hain gaixoaren min haundia...

 

Baina Euskadik

bai zuen baita

esna zegoen

Seme ona:

eta bere didar

sendo-sendoa

heldu zen zoli

niregana.

 

Nor da, erantzun

nion bat batez,

nire maitasun

behar dena....?

Nire su epel

hau berogarri

behar duena:

nor da? nor da?

 

Eta Sabinen

gogo zindoak

azaldu zidan

Aberria!

 

Eta aberriaren

gogoak baita

Sabinek zion

nahi-haundia!

 

Ordutik maite

dut aberria;

eta ahalegintzen

naiz beretzat,

Arana Goirik

zion nahi hura

harturik neure

eredutzat.