ILLARGITARA

                Pulchra ut luna...

Nolaz diteken, nongo gertari

iges dagio adimenari...

      Ta alaz ta ere,

      egirik bada,

      eskutu auxe

      errañukada...

Sortzetik, Miren, Erruge zera,

Ama ta Birjin biak batera!

Kopet-mamia gotargiz arro,

sakona dazaut, naizenez txarro...

      zenbat dagidan

      ega gorago,

      ainbat, zalantzan,

      dakust arago.

Ta ala badere, Erruge zera,

Ama ta Birjin biak batera.

Arrats-zoriak illuna dakar,

esna-eraziz ontz ta xaguxar...

      Oro geldi da.

      Otsik iñun ez...

      Sorgin egada

      guzion gañez...

Sorgiñak berak txistua jo du

ta illargi-izarrak izeki ditu...

Izarrak lagun, illuna etsai,

itsas-ertzean nago egi zai.

      Illargi bete,

      adar urdiña,

      lurrun irule,

      zillar-joskiña...

itsas-auspoak darakar zikor.

ta izar erdian apurka dator.

Illargitara... oro geldi da,

marmarka itxaso... neurriz taupada.

      Pizti-txirrika

      ulu eziñik...

      Buru-ausika

      gogait egiñik,

barren-odeiak noiz ta beltzago,

itsas-orpoan nasturik nago.

Illargi meak dagit musuka,

ugin-gezalak aitz-atzimurka...

      Ta itsas altzoan

      musu borobil...!

      Noruntz digoan

      aruntz darabil...

Nondik dan ori... asege nago...

Uretan izan geroz geiago!

Ugin-barrenak argiz josiak,

itsas-osiñan par illargiak.

      Itsas-erraian

      par illargiak,

      jira nasian

      kiñu pitxiak...!

Garden azala, diztiz ondarra,

garbi azpia, gaña leiarra...!

Illargiaren biko bizia,

izar txurien kiñu berria...!

      Ugin-azala

      urratu barik,

      barren-itzala

      urrez jantzirik...

be-bean dabiltz parre ta mugiz,

legor-bustian batera biziz...

O Miren eder! Erruge zera,

Ama ta Birjin izar antzera!

      Irudi dezu

      itsas-kolkoa...

      Ta askatu degu

      korapilloa...!

Nondik ta nolan, argitara da,

ezkutua gaur erraiñukada...!

Itsas-errota kanta-kantari,

ta izar-ugiñak elkar-dantzari...

Zeruko Argia 156, 1931ko abendua, 159. or.

MEOE 955. or.

Eusko-Olerkiak IV 1933, 105. or.

Yakintza 4, 1933, 251. or.