ENADA BELTZA

                I

Ura, bai, zala lagun zintzoa

leio-ertzeko enadatxoa!...

Udaberriro bazetorkidan!

Mingain jatorraz abesten zidan

    eresi xamur, polita.

Txo-rro-txo-txio!... egun osoan

egoten oi zan nere leioan,

    leioan tente jarrita.

Goiztarra izanik esnatzen niñun

pipir alaiez oraindik illun!...

Ta irabioka

    jolas-txioka

nere gain beti egunik-egun.

Arazo garaiz aldiz zetorren...

txio zorrotz bat eman ondoren,

nigan xabalik

    begik jarririk,

kiñu politak zizkan egiten,

mingain bikoitza erakutsirik.

Arto bizar ta lokatz biguna

elkar josiaz, kabi txukuna

    ipiñi zidan zintzilik...

Jolas-alditan gordetzen oi zan

arret aundiaz kabi-ondarran,

    ni zaintzearren barrendik.

Ikusten niñun billa ezinik!...

Buru koxkorra erdi-jasorik,

kiñu naikoa!...

    Txio gaiztoa!

Ta ixilik berriz sartzen zan geldi,

nere zai beti... beti lapurki!...

Elkarren leian ezin obeto

biok emen bizi giñan.

Lagun oberik arkitu ezin;

orren maitagarri baitzan!...

Leio-ertzean tente jarri-ta,

zeinbat atsegin zemaidan!...

Ura, bai, zala lagun zintzoa

leio-ertzeko enadatxoa!

                II

Eldu zitzaigun negute otza,

zorigaitzaren odei mingotza...

    Ezur damate zugaitzak...

Urez gañezka datoz ibaiak,

ta apairidu ditu eusko-mendiak

elur txurien orratzak.

Or daramatzi aize zakarrak

zugaitz adarren osto bakarrak.

Ekaitzen mende,

    noralde gabe,

nekez gaindurik mende-lepoak,

igeska doaz pagausoak.

Aldatu ziran beste txoriak,

aldatu ziran urrun, guziak;

    ez da bat ere gelditu...

Bakar-bakarrik bart arratsean,

enada beltza leio ertzean!

    Nolaz nigandik urrundu?...

                III

Txio ta txio, ega motxean,

enada beltzak leio-ertzean

    itunki negar dario...

Nolaz ixildu ene txoria,

zintzilik zeukan kabi guria

gabaz izoztu bazaio?...

Iñolaz ezin... ezin eraman

geldi-geldiro jeixten ari dan

    elurra batez izotza.

Txori gaxoa!... egati arro

abegi eske asekai dago;

noizbeinka txio zorrotza!...

Ideki nion leiatil xarra!...

ta ideki zidan bere paparra!

Txio ta txio

    negar dario!

Nolaz ixildu ene txoria,

zintzilik zeukan kabi guria

elur ixilez bete bazaio?...

                IV

Ezin sinistu!... Ametsa ote...?

Illotz... illotzik dakust, ai! ortxe

    elur-lorez estalia!...

Zeru berberak ordaindu zion

lagun on batek ziñez zor dion

    atsegiñezko illobia

Atseden adi, evada beltza,

egin zak, bai, lo gozoa!

Ire jolasen ordaingarritzat

artu zak nere txaloa!

Atseden adi leio-ertzean,

atseden lagun zintzoa!...

Zeruko Argia 147, 1931ko martxoa, 37. or.

Mila euskal olerki eder (Aurrerantzean MEOE) 961. or.

Eusko Olerkiak IV 1933, 111. or.

Yakintza 1933, 335. or.