EZTEI EDERRAK ESKUAL-HERRIAN

Eztei ederrak Eskual-Herrian

Egin ditugu ihauterian

Bozkariorik haundienean:

Bai ahideak, mahain berean,

Adixkidekin bat egitean,

Zoriona zen gure artean!

Nahiz ez ginen haundietarik

Espos haukien bi aldetarik,

Ginen eskualdun garbietarik:

Jakintsun haundi jaun hoietarik

Zaiku ethorri batto bakarrik,

Izultzekotan gu xoraturik.

Burua gora handi-handian,

Bizar gorria kokots-azpian,

Jaun hura zagon denen erdian;

Gu oro ixil, mintzo zenean:

Iduri saindu hastapenean,

Satan ttipi bat zen azkenean.

Jakintsun horren jakitatea

Da Korodunen laidostatzea,

Jainkoa baithan ez sinestea;

Mundu hau eta gu egitea,

Ez deusetarik gauzen hastea,

Horren ustean, da subertea.

Erran du: «Ez da botheretsurik,

Gizona baino gorago denik,

Hari gaztigu eman dironik:

Ez zorigaitzik, ez zorionik,

Ez arimarik berex dagonik:

Akabo denak hilez geroztik!».

Tunanten gisa mintzatu baitzen,

Gazte gaizoek sinetsi zuten,

Ustez egiak argitua zen:

Ez zen ez gaizki irriz asetzen,

Haren gezurra ez zela galtzen,

Toki onean zuela saltzen.

Mendigaineko Piarresttipi

Beldurrik gabe zitzaion jeiki:

«Ixil zaite hor, ez mintza gaizki!

Arras zorotzat gauzkatzu naski;

Jakintsun zira, bainan ez aski:

Tontoak ere zerbait badaki.

»Huna oiloa mahain-gainean;

Arroltzea zen amaren pean

Gero xitoa sortu zenean:

Arroltzerik ez mundu-hastean,

Lehen oiloak erron artean;

Nork du lehena eman munduan?

»Nungo gizonak dautzu erranen:

Geirik gabe dut lana eginen,

Deus erain gabe, sortaraziren?

Hastapenean azirik ez zen;

Lehen bihia nork eman zuen?

Ikus-azu hor Jainko bat baden!

»Begira-zazu iguzkiari,

Arratsetako ilhargiari,

Gau izar-arte garbienari!

Zoin jakintsunek ditu ezarri!

Jarraik-arazten tenoreari?

Hor erraguzu nor den gidari!»

Jakintsun hura hasi zen kantuz,

Bere bizarra bihurdikatuz,

Gehiago deus ezin asmatuz...

Lehen erranak gero ukatuz,

Bere bunua ezin garbituz:

Hura zen, hura, tonto-Pilatus!

Pilatus horrek badu bai lagun

Mila batean sei-zazpi ehun:

Hek utz ditzagun ahalaz urrun!

Gu Eskualdunak, gauden fededun;

Jainkoa othoitz gau eta egun;

Gero zerua goza dezagun.