MICHELENGO ZUBIA

Michelengo zubia, zubi famatua,

Arraintzariendako toki hautatua;

Haize-hegoak han du azkarra xixtua,

Niri laster egin daut xapelaz tratua,

        Xapelaz tratua.

Hameka orenetan, oraino barurik,

Zubi hartan arraintzan ari nintzelarik,

Arrain bat naukalarik amuan lothurik,

Haizeak ereman daut xapela burutik,

        Xapela burutik.

«Hasarre heldu hintzen, hozturik mendian

Niri mendekatu haiz; hobenik ez nian...

Zer hauen hartzekorik ene xapelian,

Gisa hortan sartzeko hartuta urian?».

«Aphezari burutik xapela kentzia

Barkhatu erran gabe, hoi duk ausartzia!

Hegoa erho zela nian aditzia...

Noiz ikhasi-gogo duk zer den zuhurtzia?».

«Hastiagarri haiz, egunaz bai gauaz,

Oro erhokeria; ez dakik zer nahas...

Ez duka urrikirik egin dukan lanaz,

Gisa huntan emanik apheza buru-has?».

«Nungo Satan gorriak igorria hintzen?

Ez haut ikusi ere xapelaren hartzen!...

Hartu dukan lekhurat ez baduk bihurtzen,

Jakinen duk enekin zertarako haizen».

«Haize, izanen duk justiziaz gerla.

Segur duk, preso ere harturen hutela;

Baionan galtzen badut, Pau-erat apela.

Ez badautak bihurtzen ebatsi xapela».

«Aphezen xapelari aski aiher denik,

Baduk bai mundu huntan haizeaz bertzerik.

Khentzen ahal baluzte hik bezain ixilik,

Ez ginezakek ibil buruan xapelik,

        Buruan xapelik!».