GIZONA KANTATZEN DUT

Gizona kantatzen dut

bai

gizona

eta ez aingerua

ez eta santua

—hauek aldaretan dute lekua—

gizona kantatzen dut

baina utz zaidazute aurretik

potroari lotuta daukan katea porrokatzen

utz zaidazute mailuka

bai

mailuka

katenbegiak hausten bana-banaka.

Honezkero ixildu dira txoriak

honezkero loreak

ez dute usai onik ematen

honezkero gau beltzean datza lurra.

Guardia

zer ordu da?

hamabik?

ordubik ?

hau ilunbe latza

giltza behar dut

giltza

libratzeko

katetan dagoen gizona

ez nauzu lapurra

kide nauzu katetan dagoena bezala

idazu giltza

bai giltza

gero bai

gizona libratzen dudanean

egingo dugu zurruta...

Baina ez didate giltzik eman

eta

mailuka

bai

mailuka egin behar lan;

hasi naiz mailuka

marrantatu zait eztarria

alperrik guzia

alperrik jotzen dute mailukadak

ilunbetan galtzen dira:

lo-zorro dago guardia

apoten lastai bilakatu da mundua...

Eta bitartean?

bitartean

katetan datza gizona

atzarria

urrutira zuzenduz begia...

horrela

nola

kantatu gizona?

nola ?

alperrik jotzen badute mailukadak?

ilunbetan galtzen badira?