Hostoz ta lorez jantzi dira zuhaitzak...

Zuri-zuri dagoz zelai ta baratzak...

              Elurra bezela

              Agertzen dirala...

Huri baserriak daude aberatsak

Edertasun alaiez bete-beteak

Lorien usai gozoz ase-aseak.

Edertasun atsegin hau ikusirik

Txoriak ezin dira egon isilik

              Eta zorionez

              Atsegintasunez

Egun guztian bai dabiltza poz-pozik

Abestuaz abesti samur, politak

Alaitzen zuhaizti, baserri, zelaiak.

Mendiko ote arantzadunak utzita

Arkumetxo gaixoak bera jatsita

              Zelaietan daudez

              Belar ona janez

Eguzki edertsua hartuaz be-beka

Zoriontasunez ta pozez beterik

Negu txarren hotz gogorrik ez dutelik.

Zuhaizti, mendi, zelai, huri, baserri

Guztiak arkitzen dira alaitsu ta argi

              Ekaizterik gabe

              Eguzkian jabe

Ipar haize ederra izanikan gidari...

Nunahiko bazterrak dirade ikusgarri

Ez dago zalantzik hau da ba Udaberri.

                                           1918’garren urtean Donosti'ko Euskal indar neurtzetan

                                           lendabiziko mallan saritua.