|
Gernikako arbola
Da bedeinkatua
Euskaldunen artean
Guztiz maitatua.
Eman-da zabal zazu
Munduan frutua
Adoratzen zaitugu
Arbola santua.
Iparragirre
Lehen antzinean
Gure asabak Bizkaiko herri
Polit batean
Haritz ederra
Zuten aldatu erakutsirik
Euskal indarra.
Haritza aldatu
Ta bere itzalpe gozoan eusko
Jaunak alkartu
Batzar bileran
Legeak egin ta erabaki
Zintasunean.
Gero azkarki
Agintz zuzenak zabaldu nunahi
Ahal zan hobeki
Euskal Herrian
Jakin zezaten zer gertatzen zan
Beren artean.
Nahi bezin ongi
Eusko semeak jaioterrian
Ziraden bizi
Beti berekin
Zuten zoruna... aitona zaharren
Agintz haiekin.
Horregatikan
Euskaldun bikain Iparragirrek
Beldurra zeukan
Haritza hiltzeko
Askatasunen ikurkora zan
Bada, galduko.
Haritz sendua
Oraindik zutik... hezea dago
Ez da ihartua
Bainan beraren
Azpian eusko semerik ez da
Gaur bileratzen.
Zertako degu
Haritza lege zaharrak betiko
Ba ziran galdu?
Zertako degu
Bere itzala, eusko jaunak hotzez
Ba dagozte estu?
Galdu baitziran
Lege zahar onak, galdu baitziran
Zoritxarrean...
Haritz gurea!
Ez egon zutik besten pargarri...
Hil, hil, maitea!
Ez, ez, Haritza!
Zaude zutikan badator ere?
Gogor ekaitza
Bihar egintzak
Behar dute izan Iparragirre
Zanaren hitzak.
Esnatu gera
Euskaldun onak, errukitu da
Gure Jainkoa
Zure itzalpean
Euskoak laister bilduko dira
Zorionean.
Behar dituzu
Zure adarrak oraindik gehigo
Zabal luzetu...
Jakin behar du
Ludiak, euskoen zuhaitz deuna
Zeradela zu.
Iparragirre!
Lo egin zazu orain arte egin
Ez badezu ere
Zure gogoko
Zuhaitz maitale kutuna ez da
Inoiz ere hilko.
Uste gabean
Laister batuko dira Haritzaren
Itzal gozoan
Euskotar jaunak
Ta zuzenduko dituzte lehengo
Lege zahar onak.
Haritz azpian
Batu euskoak ta erabaki
Denak batean
Gentz ederrean
Egitea anai-agur haundi bat
Zure izenean.
Esnatu gera
Euskaldun onak, errukitu da
Gure Jainkoa...
Zure itzalpean
Euskoak laister bilduko dira
Zorionean.
Behar dituzu
Zure adarrak oraindik gehigo
Zabal luzetu...
Jakin behar du
Ludiak euskoen zuhaitz deuna
Zeradela zu...
Urretxua’n Iparragirre zanaren oroitzaz
egindako yaietan saritutako olerkia.
| 
