Gauean ontuts
Jakes Ahamendaburu
Maiatz, Uhargi 22, 1990eko apirila

Eztiagotu zaigu

azkenean

uztail mineko ekia

Ohitza lizunez

ihaurri dagotzin

baserri tristeetan;

gau ilun beraren

aiduru diraute

poetek, itzal edaleek...

Noizbait ganbaraz

tronpatzen dirade

maitasun harroak

Noizbait ere

isiltasunez

urratzen dirade

ortzondo nabarrak

Beti beste nonbait

zaigu erortzen

sasoien ulu luzea

eta inorenak ez direlarik

errez dira ahazten

amodiozko kontuak...

Gauean ontuts
Jakes Ahamendaburu
Maiatz, Uhargi 22, 1990eko apirila