Andre Dena Maria

Birjin eta Ama Maria

Zeruko Aita Jainkoaren

        Alaba,

Seme Jainko Gizonaren

        Esposa,

Trinitate Dibinoaren

        Tenplua,

Munduko eta Zeruko

        Andrea,

Aingeruen ta gizonen

        Erregina,

Bekhatore penatuen

        Adbokata,

Egiozu othoitz guretzat

        Jainkoari.

                        Hala biz.

Andre Dena Mariaren bestak

        Konzepzionea

Ala neskatxa ttipito hau,

Neskatxa hagitz ariga!

Garbia duk, eztik bekhatu

Orijinal itsusia.

Egundaiño eztik bihotz hau

Satan hatsak profanatu.

Jainkoak zien bere tenplu

Bethi-eretik hautatu.

        Natibitate

Neskatxa, beraz sortzen zare

Guretzat zeru berria,

Mundurat guri ekhartzeko

Arimako iguzkia.

Zure arraiak hedatzatzu,

Goizeko argi izarra;

Eta errazu sortzen dela

Gure iguzki ederra.

        Presentazionea

Eksenplurik gabeko Ama,

Birjina paregabea:

Zaude tenpluan, noizbait horko

Izanen zare Andrea.

Konsekra behar diozu

Hirur urthetan bihotza,

Amabortzetan izateko

Jainko Jaunaren egoitza.

        Anunziazionea

Misterio dibino huntan

Ama da egiñ Birjiña,

Egun saindu huntan berean

Jainko da egiñ gizona.

Aingerua da mandataria,

Espos Spiritu garbia,

Eta neskatxa ttipi bat

Jaunaren Ama handia.

        Purifikazionea

Ah, zer espantu eder da hau!

Jainkoa da imolatzen,

Eta xahutasuna bera

Halaber purifikatzen.

Ama eta Semea dire

Egun dohatsu hunetan

Bi hostia amudiozko

Aldarearen oiñetan.

        Asunpzionea

Ikhus-azue nola doan

Maria koroaturik,

Zeruetako nobleziaz

Gustia inguraturik.

Ala hau triunfa ederra!

Ideki ditu zeruak;

Hango Erregina eginik,

Eskutan ditu tronuak.

Birjina Ama Maria bere Jesus Haurrarekin
erretaula batean pintatua

Ikhusten duken Haurtxo hau duk

Gizona eta Jainkoa,

Eta Haurtxo hunen Ama hau

Erregiña zerukoa.

Posible da beraz munduan

Ikhustea pinturarik

Pintura handi hau den baño

Handiago daitekeenik?

Erregiña Birjina hau duk

Munduaren ilhargia,

Eta Jainko gizon Haur hau duk

Munduaren iguzkia.

Posible da beraz munduan

Ikhustea figurarik,

Figura argi hau den baño

Argiago daitekeenik?

Birjina Ama Andre hau duk

Arrosa bezaiñ ederra;

Haurrak, lilia bezaiñ xuri,

Iduritzen dik izarra.

Munduan beraz posible da

Ediretea gauzarik

Gauza dohatsu hau den baño

Dohatsuago daiteenik?

Birjina Amak zaiadukak

Besoetan bere Haurra;

Elhurra zidurik Birjinak,

Haurrak zidurik elhurra.

Posible da beraz munduan

Ikhustea pinturarik

Pintura xuri hau den baño

Xuriago daitekeenik?

Haur hunek tik ihortziriak

Erabiltzen hedoietan;

Dostetan hau bera hari duk

Ama baten bulharretan.

Munduan beraz posible da

Ikhustea espanturik

Espantu eder hau den baño

Ederrago daitekeenik?

Ama humil bat duk Birjina,

Jainkoaren gidaria,

Amari Jainkoak ekhartzen

Ziok obedienzia.

Posible da beraz munduan

Ahal daiten pinturarik

Pintura eme hau den baño

Emeago datekeenik?

Esnerik baizen eztuk Haurra,

Gustia ezti eztia;

Ama ere Haurraren gisa,

Ezti eztia gustia.

O Jainko ona! Posible da

Pensatzea figurarik

Figura eztia hau den baño

Eztiago daitekeenik?

Haur hau berbera izatu duk

Gustien Salbatzaillea;

Birjina Haurtxo hunen Ama

Gure ungiegillea.

Jendeak, posible da beraz

Ediretea molderik

Molde glorios hau den baño

Gloriosago daitenik?

Jesusen eta Mariaren izenak
bihotz deboten konsolagarriak

Mundua, ixil adi: utzik

Hire ponpa itsusiak;

Zeruko plazerez tiagu

Bethe behar beharriak.

Bertze fazoiñ ederrez tie

Jesusek eta Mariak

Bere izenez kontetatzen

Egun gure beharriak.

Ithurriak, zer ere gauzei

Baitzaie freskotasunaz,

Beharriei hura ziaiek

Jesus bere ontasunaz.

Eztiago da guretzat,

Maria, zure izena

Ezen ez harrizkotxoetan

Tixirripa soiñuz doana.

Hegastinak, iratzartzean

Errepikak egitzue,

Goiz alba xuritzean baño

Hobeki kanta zazue.

Emozue zuek abisu,

Hegastinak, ithurriei;

Xirripei, zuek, ithurriak,

Xirripak landa gustiei.

Hitz hauk oreiñek aditzean

Egiñen tie jauziak;

Hariko dituk bere modan

Dantzan arroka mendiak.

Iguzkiak pintatukotik

Izar xuri gustietan;

Ekharriko tik ilhargiak

Bere adar urdiñetan.

Bañan, edo argitzen bada,

Edo ilhuntzen eguna,

Dela goiza, dela arratsa,

Fiñean azken orena,

Dugun bethi amudio

Gure bihotzen barnean,

Ditugun Ama-Semearen

Izenak bethi ahoan.

Jesus eta Maria dire arima deboten amudioa

Jesus, amudio, ohorea,

Zeruko amudioa:

Ala zure izenak baitu

Hagitz grazia gozoa!

Uri-tormenta, elementak

Hitz batez tutzu kalmatzen:

Su, xixmista, ihortziriak

Begi-kheiñuez manatzen.

Jauna, harritzen darotazu

Osoki ene gorphutza,

Bañan flakatzenago duzu

Oraiño ene bihotza.

Gero zu ondoan, Maria,

Ene surik eztiena;

Maria, zu Jesusen Ama.

Ene kharrik ederrena.

Lurrean egin zaitu Haurrak

Bihotzen amudioa;

Bethi zeruan izatekotz

Begien Bozkarioa.

Ah, bai, Jesus eta Maria,

Arimen tresor handiak,

Zuek xarmatzen dituzue

Gure arima gustiak.

Jesus Jauna, Jainko gizona,

Gizonen Salbatzaillea,

Maria, Jainkoaren Ama,

Gizonen laguntzaillea.

Zuek maite ez zaituztenek

Bihotzak tuzte harriez;

Edo harriez ezpaituzte,

Behar dituzte elhurrez.

Beraz izanen tugu bethi

Zuen izenak mihian,

Bethi zuen amudioa

Gure bihotzen erdian.

Ama Birjinaren auhenak
Gurutzearen aitzinean

                Euskaraz, Stabat Mater.

Ama zegoen tristea

Kontenplatzean Semea

Habean itzatua.

Bihotz malenkoniosa,

Triste eta dolorosa

Dagaz zuen zaurthua.

Ah, zeiñ hagitz zen tristetu,

Birjina benedikatu,

Haur eder haren ama.

Amaren doloratua!

Ikhusirik penatua

Semearen arima.

Andre hura aditzean

Haiñ dolore borthitzean,

Nor eztzen tristetuko!

Ama doluz ikhustean

Semearekiñ batean

Nor eztzen flakatuko!

Ikhusi zuen zaurthurik

Burreuek azotaturik

Salbatzaille emea.

Ikhusi habean hiltzen,

Eta penek erdiratzen,

Jesus bere Semea.

Ama amudiozkoa,

Izan duzun ondikoa

Niri ere indazu.

Ariman barrena harra,

Bi begietan nigarra,

Eman diezadazu.

Bethe dazu othoi, Ama,

Dolorez ene arima,

Triste nadiñ zurekin.

Indazu su bihotzean

Jesus-Kristo maitatzean

Dagizudan atsegiñ.

Ama, gauza bat egizu

Gurutza diezadazu

Semea bihotzean.

Har nazazu Semearen,

Enegatik hil denaren

Partale Gurutzean.

Utzi nazazu Jesusekiñ,

Haren pena handiekiñ

Egon nadin dolorez.

Egidazu garazia,

Zurekien, o Maria,

Bizi nadiñ deithorez.

Arren, Birjinen Birjina,

Amarik den hoberena,

Utz nazazu hiltzera.

Bai, egidazu fabore

Laster dagidan nik ere

Jesusen Gurutzera.

Zilha nazazu zauriez,

Sesi dolore gustiez,

Haren amorekatik.

Haren odol sarraskiak

Eta tormenta handiak

Jasanen tut gogotik.

Jujearen aitziñean

Azkeneko egunean

Behar nauzu beiratu.

Semearen Gurutzeaz,

Odolaz, Heriotzeaz

Behar nauzu salbatu.

Arma nazazu itzeez,

Lantzaz eta arantzeez,

Bizi nadiñ grazian.

Gero hil eta munduan,

Ediren nadin zeruan

Zurekien glorian.

                        Hala biz.

Arima deboten auhenak
Andre dena Maria Birjina Amari

Hiltzen zegoenean Jesus

Gurutzean itzaturik,

Galbarian zegoen hiltzen

Maria dolorez urthurik.

Semeari zioten hautsi

Burreuek bere gorphutza,

Eta Amari dolorezko

Dagaz iragan bihotza.

Egundaiño bihotzek elkhar

Eztzuten hala maitatu;

Egundaiño eztziren hala

Doloreak inkuntratu.

Semeak zela zidurien

Hil-bizirik zen presuna;

Amak halaber zidurien

Bizi-hillik zegoena.

Non dire haiñ bihotz gogorrak

Plakatuko eztirenak,

Baldin entzuten badituzte

Birjina hunen auhenak?

Hunen beherazpenek tuste

Harri-arrokak zathitzen;

Hola bada eztitu berak

Gure bihotzak ukitzen?

Tromentan duenean Amak

Bere Semea ikhusten,

Semearen heriotzeak

Ama du thonban ehorsten.

Jainko ona du gaxtagiñak

Bere eskuez urkhatzen;

Gaxtagiña du Jainko onak

Heriotzetik libratzen.

Arren, Ama doloratua,

Ama amudiozkoa,

Indazu ene bihotzean

Senti duzun ondikoa.

Zure Seme onarenganik

Ardiatstekotz grazia,

Ama, behar dut bihotzean

Zuk bezala tristezia.

Indatzu bihotzean beraz

Zuk ditutzun doloreak,

Eta zure doloreekin

Guretzekoen pareak.

Helaz parti dietzadatzu

Izerdiak eta penak,

Gustien zorren pagatzeko

Jesusek hartzen tuenak.

Ene faltak duenaz geroz

Gurutze hori landatu,

Gurutze horren oiñetarik

Eztut nahi apartatu.

Hor naiz zurekiñ Galbarian

Bizi naizeño finkatzen,

Sekulakotz hor dut zurekiñ

Ihezlekhua hautatzen.

Beira nazazu ifernutik,

Hobendunen Beiraillea:

Helaz, ni naiz, aithortzen dut,

Iainkoaren hiltzaillea.

Bañan ungi ni punitzeko

Grazia bat egidazu;

Zure Semeak jasan duen

Gurutzea karga dazu.

Nola aitu amudioak

Zure haurra konsumitzen,

Ez othe du enetzat ere

Su guti bat begiratzen?

Erre nazazu beraz, othoi,

Gurutzeko su sainduez,

Behiñ ere erre ez nadiñ

Munduko su profanoez.

Nik habean handi gustien

Erregea hilagatik,

Esparantza dut hala ere

Biktoria Gurutzetik.

Arren, egidazu grazia

Habe hunen faboretan,

Ediren nadiñ Jesusekiñ

Gloriako triunfetan.

Andre dena Maria agonian
xirioa eskuetan

Adoratzen zaitut humilki,

Zeruko majestatea;

Adoratzen eta maitatzen

Halaber Trinitatea.

Xirio bizia eskuan

Heldu naiz adoratzera,

Bihotzean amudioa,

Ethortzen naiz maitatzera.

Nahi nuke ene bihotza

Erre ledin zure suan,

Xirio hau urtzen den gisa

Urt ledin zure ondoan.

Jainkoa, har dezazu beraz

Ene bihotzeko sua,

Edo bederen har dezazu

Ene xirio saindua.

Eztute biek bere sua

Non eztuten zureganik,

Zure suan pitztuak dire

Bizi nahiz zuregatik.

Eztu kherik zeruko suak

Munduko suak bezala;

Zeruetako su ederrak

Ah, beraz erre nazala.

Helaz, ene jauna, indazu

Zuk plazer duzun arima,

Arimaz zuri egiteko

Plazer duzun erresuma.

Finka tzatzu ene desirak

Zure obedientzian;

Emazu ene ondasuna

Zure perseberantzia.

Zaren, beraz, ene herria,

Zaren halaber bihotza,

Eta ene on dohatsuen

Sekulako esparantza.

Haiñ su borthitz eta haiñ eme,

Haiñ eztiaz erre nadin,

Non sentitu gabe penarik

Gustia konsumi nadiñ.

Helaz, ene Joingoiko Jauna,

Indazu, othoi, bihotz bat,

Zuri atsegiñ egiteko,

Zuk plazer duzun bezanbat.

Ordean guziz nahi nuke

Bihotz hunen su ederrak

Ikhus ez letzan behiñ ere

Munduak dituen kharrak.

Bañan sekulan Jesus lizen

Errege ene ariman,

Zeruan Errege den gisa

Aingeruen erresuman.

Ah, bai, Zu ene bihotz hunek

Bazintu bere tresortzat,

Eta balu zure grazia

Bere fortuna osotzat!

Ah, Jesus! On haukiñ ondoan

Baziñe ene urrea

Eta zurekien batean

Zerua ene etxea.

Orduan leite konplitu

Ene koroa handia,

Zu Zerori baitzinatezke,

Jainkoa, ene gloria.

Andre dena Mariaren triunfa
asunpzio egunean

Herioari zerk daramo

Haiñ biktoria ederra!

Itsutu ala trunpatu da?

Ala du galdu indarra?

Espantu espantagarria!

Su berri bat da ilkhitzen;

Ilherri ilhun hotz batetik

Gustiak gaitu berotzen.

Ah, Maria, ezta zu baizen,

Zu, o zeruko Prinzesa,

Zuk erakusten duzu hemen

Zure triunfa ponposa.

Hau da, hau, espantu ederra!

Itzaletik du argitzen,

Eta izar batek bezala

Arraiez du distiatzen.

Hunen aparaillu nobleaz

Harriturik iguzkia,

Huni agur egiñ beharrez

Utzten du bere biaia.

Doblatzen tu bere argiak

Eta argitzen eguna,

Ohoratu behar duela

Hunen ilherri ilhuna.

Botzik daude zeru gustiak

Kanta berrien erraten

Eta ihortziria soiñuz

Harmoniaren egiten.

Hau da, hau, espantu handia,

Hunek ezpaitu parerik!

Huna non bizia heldu den

Herioaren etxetik.

Kontenpla dezagun tronu hau,

Zeiñ hagitz den edertua!

Tronu bizi, tronu glorios,

Izarrez distiatua.

Aingeru dohatsu bildumak

Inguratu du gustia;

Tronuan darama semeak

Parabisuko gloria.

Ala hau espantu ederra!

Hilherritik hil-ondoan

Sartzen da Andre bezala

Zeruko palazioan.

Birjina Ama sainduaren salutazionea

Nihon ere ikhusten baduk

Birjinaren iduria,

Beirauk, ez pasa, erran gabe

Humilki: Agur, Maria.

Giristiñoari Saint Bernardek egiten dio presenta,
esplikaturik Andre dena Mariaren botherea
ebanjelioko hitz haukien gañean:

        Missus est

                I

Konsidera ezak zeiñ urrun den

Hedatzen hemen mundua;

Hurren galtzeko ziabillak

Uhinpean populua.

Trunperiarik baizen eztuk,

Ah, zer tromenta handia!

Itsaso huntan mariñelak

Izarra die Maria.

                II

Non ere baitaiz enbarkatzen

Itsaso zabal hunetan,

Bela gustiak hedaturik

Arimaren perilletan,

Eztezakela konsidera

Norteko izar argia;

Baiñan ikhusak, begira dagok

Lagundu nahiz Maria.

                III

Othoitzik egiten ezpaduk,

Trometan duk altxatuko

Eta itsaso asarrean

Untzia darok galduko.

Baldin hor hondoratzen bahaiz

Eta sartzen ifernuan,

Alferrik othoitztuko dukek

Maria lekhu galduan.

                IV

Horra nola zeru ederra

Non den hedoiez kargatzen,

Eta ihortzirian barna

Deabrua non den estaltzen.

Galdu nahi tik mariñelak

Itsasoaren erdian;

Laster egik, finkatzak laster

Hire begiak Marian.

                V

Senti baduk hantzen zaikela

Luziferren urguillua,

Edo mihi gaizki mintzatzen

Hañitz aldiz usatua;

Sumintzen bazaik muthiriki

Bihotzean suge-herra,

Othoitztu behar duk humilki

Itsas-handiko izarra.

                VI

Kolerak edo plazer hatsek,

Halaber abariziak,

Hondatu nahi badituste

Zuen arimen untziak:

Zeru gustiak iraganik,

Altxatzak hire begiak:

Peril hautan argituko au

Zeruko izar argiak.

                VII

Baldiñ pekhatu kruelaren

Figurak bahau harritzen,

Eta bazaizkik hire faltak

Gogora berriz ethortzen;

Ikharatzen bahau Jujeak

Edo tribunal handiak,

Altxa diotzok itsasoko

Izarrari bi begiak.

                VIII

Baldin iretsi nahi bahau

Deabruen tulunbioak,

Edo tormentatu arima

Hekiñ desparaziñoak,

Laster dukek bozkarioa,

Laster kuraia handia,

Pensatzen baduk nola zaiken

Lagundu nahi Maria.

                IX

Baldin bihotza hersten bazaik

Eta nahasten dudetan,

Edo baldin kausitzen bahaiz

Arimaren perilletan,

Utzkik hire duda ilhunak

Eta beldurrak osoki:

Gero egiok Mariari

Bihotzez othoitz debotki.

                X

Agertzen denean egunaz

Hedoietan iguzkia,

Eta gauaz pasatzen bada

Bere bidez ilhargia,

Gogoan idukizak bethi

Zeruko izar xuria;

Bethi idukak bihotzean,

Laudazak bethi Maria.

                XI

Othoitzetan agoenean,

Xahu idukak bihotza,

Pensamenduak, hitzak, obrak,

Arima eta gorphutza.

Fiñean garbiki behar duk

Eraman hire bizia,

Eta egiazki othoitztu

Birjina Ama Maria.

                XII

Haren ondoan joaten dena

Bidean eztuk unhatzen;

Erortzen dena laster die

Haren othoitzek altxatzen.

Bañan nork ere haren baithan

Baitu bihotza ematen,

Salbamenduko garazia

Herioan dik izaten.

                XIII

Ala baitire dohatsuak

Hark dituenak beiratzen!

Edozeiñ peril suertetan

Ezpaitire hirriskatzen.

Haren ondoan dabiltzanak

Eztituk errebelatzen,

Eta hark maite dituenak

Gloriara tik gidatzen.

                XIV

Beraz hauk delientki dituk

Bihotzean ezarriko;

Obretan hauk maiz emanen tuk

Eta maiz irakurriko.

Baldin nahasten bliz ere

Tromentan mundu gustia,

Berehala kalmatuko duk:

Izarra baitu Maria.

Ala den ederrago Jesus,
haur bezala bere amaren besoetan,
ala gizon bezala aita eternalak landatu gurutzean.

Ene arima, zeiñ othe zaik

Biztarik den ederrena,

Eta zeiñ da bi begietan

Nahienik ukeena?

Ala ikhusi Jesus Haurra

Bere Amaren altzoan,

Ala Jesus gizon egiña

Aitak eman Gurutzean?

Batean edirenen dituk

Atsegiñ maitagarriak,

Eta bertzean ikhusiko

Tromenta harrigarriak.

Inspiratuko darok batek

Zeruko amudioa,

Bigarrenak erakutsiko

Dolore estraiñioa.

Eztuk amudiorik asko

Haurtxo hunen maitatzeko,

Ez eta dolorerik ere

Gizon huntaz tristetzeko.

Ah, bai, bi gorma hauk bahitu

Sesitzen infinituki,

Eta ofritzen behiote

Hire bihotza osoki!

Jesus Jauna, errendatzen naiz,

Nahi zaitut adoratu,

Baita infinituki ere

Laudatu eta maitatu.

Ene falta denaz geroztik

Haukien bien oldea,

Amudioa ethor bedi

Eta ethor dolorea.

Bi figura haui zioteak

Ematen bihotz gustia:

Haukiñ bientzat izanen duk

Bethi-ereko Hostia.

Jesu-Kristo Jaunaren odol preziatua
eta Ama Birjina andrearen ezne sakratua
dire bekhatorearen esparantza

Aita, zeruko erresuman

Errege puxanta zarena,

Nik izateko zureganik

Ontasunik handiena,

Kontenplatzea asko duzu

Seme Jaunaren sahetsa;

Hunen Odola pisa zazu

Ea zeiñ den aberatsa.

Hagitz da hau handiagoa

Ezen ez mundu gustia,

Eta hagitz baliosago,

Ezen ez zure gloria.

Jainko Jauna, hauxe da bada

Oso osoa zurea;

Zurea dela, da halaber

Oso osoa enea.

Norat zure ihortziriak

Darostatzu egotziko?

Zure furian ni justuki

Nola nauzu punituko?

Odol dibino eder hunen

Xortarik den ttipienak

Garbi detzake nik ditudan

Bekhaturik handienak.

Zor terribleak egiten tut

Bekhatuak egitean;

Bañan pagatzen gehiago,

Odol huntaz pagatzean.

Ezta deus balio duenik,

Jainko baten prezioa!

Enganatzen naiz; odol hunek

Badu zure balioa.

Ah Jesus! Nik zenbat merezi

Zure suak, zure kharrak!

Bañan, othoi, ikhus detzatzu

Zure Amaren bulharrak!

Haurrean xarmatzen zintuen

Amaren ezne eztiak;

Orai ere xarmatuko tu

Zure kolera gustiak.

Odol eder, ezne eztia!

Behar nauzue barkhatu.

Gorphutzean eta ariman

Behar nauzue xahutu.

Zuen baithan bihotz xahuek

Tuste bere ithurriak;

Zuek zarete berthuteen

Egiazko hazkurriak.

Andre dena Mariari
konsekratzen zaio debota

Zeruetako erregina

Prinzesa paregabea,

Aingeruen amudioa,

Saindu gustien Andrea!

Ene mihiak darozkitzu

Ematen laudorioak:

Eta bihotzak konsekratzen

Halaber amudioak.

Gure birjina, gure Ama

Itzul detzatzu begiak,

Gu mundu huntan ikhusteko

Zure haur zerbitzariak.

Aditzatzu gure othoitzak,

Eztutzunaz geroztikan

Zure haurren presentak baño

Deusik maiteagorikan.

Zu zare Jainko Jaunaz landan

Erregiña nobleena:

Maiteago gure bakean,

Bañan gerlan maiteena.

Grazia galdez gagozkitzu,

Aditurikan gloria,

Espanturik daduzkatzu

Zeru eta lur gustia.

Zu zare saindu gustietan

Kreatura handiena:

Balia zakizkigu, othoi,

Amarik den hoberena.

Diduridala xirio hau

Zure zerbitzu sainduan

Argi hunen gisa nahi dut

Hil eta bizi munduan.

Andre dena Mariari othoitza.

O Birjina Ama Maria,

Erregiña handiena!

Ni naiz hobendunen artean

Hobendunik gaxtoena.

Gomendatzen naiz humildurik

Zure leialtasunean,

Zure bihotz, zure grazia,

Zure emetasunean.

Konsekratzen natzaitzu egun,

Konsekratzen bizitzean,

Guziz konsekratzen natzaitzu

Hiltzerako orenean.

Bethi gomendatzen darotzut

Arima, bethi gorphutza:

Ene fortuna, ene eskaz

Eta ene esparantza.

Zu zaitut zeruko gorthean

Hautatzen ene Amatzat,

Zu hartzen Jainko jujearen

Aintziñean adbokat-tzat.

Arren, ez nazazula kita,

O Amarik hoberena;

Eztezatzula konsidera

Ene bizitzen lizuna.

Merezi duzu entzun zaiten,

Egitzu othoitz ederrak;

Zure gogara zure bidez

Xuxentzatzu ene obrak.

Zuk eta zure Seme Jaunak

Plazer duzuen bezala,

Azken fiñean egidazue

Salbamendu eternala.

Bertzea

                Sub tuum praesidum

Ihez heldu naiz zureganat

Zeruetako Prinzesa;

Arren, ene othoitz humillak

Eztetzatzula mespreza.

Birjina, fabora nazazu

Ene behar gustietan,

Eta begira bethi-ere

Peril handi-ttipietan.

Andre adbokat, Andre puxanat,

Jesusen Ama emea,

Herioan diezadazu

Erakuts zure Semea.

Bertzea

O Birjina Ama saindua,

Oraiño ezta aditu,

Zure haurretarik duela

Jainkoak abandonatu.

Esparantza handi hunekiñ

Zuregana naiz ethortzen;

O Birjinen Birjina Ama,

Zu zaitut errekeritzen.

Hel zakizkit ikhus zaitzadan

Zeruan, Ama emea;

Hel zakizkit, maita dezadan

Glorian zure Semea.

Bertzea

        Elementa denean

Itsasoko izar ederra,

Mariñelen gidaria:

Arren, eman diezaguzu

Tromentan kalma handia.

Lagun gaitzatzu, arriba gaiten

Porturat, Ama emea;

Leihorrean diezaguzu

Erakuts zure Semea.

Salve Regina

Agur erregiña emea,

Eta Ama dibinoa,

Gure esparantza bizia,

Gustien amorioa.

Ebaren haurrak gagozkitzu

Oihuz gure desterruan;

Birjina, lagun zakizkigu

Sekulako hirriskuan.

Haran huntan darozkitzugu

Egiten beheraspenak;

Gure nigarrak xukatzatzu,

Konsola gure ahuenak.

Andre puxanta, gureganat

Itzultzatzu bi begiak;

Beharrean erakuts-kitzu

Zeiñ tutzun indar handiak.

Ah, erakuts diezaguzu

Armadetako Jainkoa,

Guregatik zuk egiñ Seme,

Jainko amudiozkoa.

Ez gaitzatzula utz sekulan,

O Birjina, O Maria!

Hil ondoan emanarazi

Diezaguzu gloria.

Ave, Maris Stella

Agur, darotzugu,

Jainkoaren Ama,

Itsasoko izar,

Gure erresuma.

Errezibi zazu

Zeruko gorthean

Guk egiten dugun

Othoitza lurrean.

Gabriel sainduak

Egiñik agurra,

Guretzat zarotzun

Promes bake ederra.

Khen ezazu beraz

Gure miseria;

Bake zazu mundu

Ebak nahasia.

Arren, argitzatzu

Gure itsutasunak;

Gure miñak khasa,

Galde ontasunak.

Khendurik osoki

Gure malezia,

Galde diozozu

Jesusi grazia.

Erakuts dezazu,

O Ama emea,

Jainko eta gizon

Duzula Semea.

Ofritzatzu gure

Othoitzak zeruan,

Erakuts zer duzun

Podore munduan.

Haiñ eme, haiñ garbi,

Zarade aurkhitzen,

Non espantu handi

Baitzare agertzen.

Iguzu grazia,

Garbi bizitzeko,

Zu gure ariman

Ungi pintatzeko.

Anima gaitzatzu

Gure beldurretan,

Goberna urratsak

Gure perilletan.

Baktzatzu gerlak

Gure biktorian,

Ikhustekotz Jesus

Eta zu glorian.

Gustiok Jainko bat

Mundu herri huntan

Dezagun ohora

Hirur Presunetan.

Koroak sainduek

Betzate behera,

Eta Jainko Jauna

Glorian adora.

Quem terra, pontus, sidera...

Jainkoa, zeiña baitute,

Gauza gustiek laudatzen,

Eta zeiñek eskuetan

Mundua baitu ekhartzen,

Lurrean eta zeruan,

Jainko Jaun adoratua,

Mariaren sabelean

Ediren da zarratua.

Zein prinze puxantak baitu

Gobernatzen ilhargia,

Zeiñek eratxeki baitu

Beregatik iguzkia,

Birjinaren bulharretan

Hartu du bere etxea,

Eta du han deskargatu

Grazia nonbre gabea.

Kreatzailleak daduka

Mundu gustia eskuan:

Maria admirableak

Kreatzaillea ariman.

Jaun Handienaren Ama

Ala zure dohatsua!

Eta dohatsu izatu

Zuk izatu enplegua!

Espiritu Saindu Jaunak

Amatzat zaitu hautatu,

Jainkoari zaizkonean

Obedient errendatu.

Zureganik sorthu zaiku

Jainko Haur prometatua,

Mundu huntan aspaldion

Ontasun desiratua.

Birjina Amaren Semea,

Jesus Adoragarria:

Duzula mende handian

Egun bezala gloria.

Gloria duzula bethi,

Aita zeruetakoa,

Spiritu Jaun, bi Presunen

Fruitu amoriozkoa.

O gloriosa virginum

Birjina, zeiña baitzaude

Gora iganik zeruan,

Zeiñak zure Jongoikoa

Hazi baituzu munduan:

Haren artha dibinoa

Zure arthak du pagatu,

Zure ezne sakratuaz

Jesus baituzu bazkatu.

Ebak galdu ontasuna

Zuk darokuzu bihurtu,

Munduari baitiozu

Salbatzaillea kobratu.

Zureganik du jendeak

Uste bere faborea,

Zeru galdura joatekotz

Egin baitzaizko bidea.

Zuk tutzu gizon gaxoak

Igan-arazi zerura,

Eta duzu jausarazi

Jainko puxanta mundura.

Populua, beraz, laudazak

Birjina Ama Maria:

Harenganik duk bizitze

Eta gloria gustia.

        Birjina Amaren Semea,

        Jesus adoragarria...

Memento salutis auctor

Orhoit zaite, Jainko Jauna,

Nola zaren konzebitu,

Haragiz nola zaituen

Ama Birjinak beztitu.

Zure eternitatean

Zinduen deliberatu:

Egin behar zinduela,

Mundua eta salbatu.

Birjina Jesusen Ama,

Graziaren ithurria:

Ala zure ontasunak

Guretzat xarma handia.

Othoi, sustenga gaitzatzu

Hemen dugun konbatean:

Gida gaitzatzu zerura

Gure azken egunean.

Birjina Amaren Semea

Jesus adoragarria:

Duzula mende handian

Egun bezala gloria.

Gloria duzula bethi,

Aita zeruetakoa,

Spiritu Jaun, bi Presunen

Fruitu amoriozkoa.

Andre dena Mariaren lethariñak

        Jauna, urrikal gakizkitzu.

        Jesus-Kristo, urrikal gakizkitzu.

        Jauna, urrikal gakizkitzu.

        Jesus-Kristo, urrikal gakizkitzu.

        Jesus-Kristo, adi gaitzatzu.

        Jesus-Kristo, entzun gaitzatzu.

        Zeruko Aita, seiña baitzare Jainkoa, urrkal gakizkitzu.

        Semea, munduaren Salbatzaillea, zeiña baitzare Jainkoa, urrikal gakizkitzu.

        Spiritu Saindua, zeiña baitzare Jainkoa, urrikal gakizkitzu.

        Trinitate Saidua, zeiña baitzare Jainko bakhoitz bat, urrikal gakizkitzu.

        Maria saindua, othoitz egizu guretzat.

        Jainkoaren Ama saindua, ...

        Birjinaren Birjina saindua, ...

        Jesus-Kristoren Ama, ...

        Grazia dibinoaren Ama, ...

        Ama guziz xahua, ...

        Ama guziz kastoa, othoitz, ...

        Ama tatxarik izatu eztuzuna, ...

        Ama maitagarria, ...

        Kreatzaillearen Ama, ...

        Salbatzaillearen Ama, ...

        Birjina guziz prudenta, ...

        Birjina ohoragarria, ...

        Birjina laudagarria, ...

        Birjina puxanta, ...

        Birjina mansoa, ...

        Birjina leiala, ...

        Justiziaren mirailla.

        Zuhurtziaren tronua.

        Gure bozkarioaren kausa.

        Untzi spirituala.

        Untzi ohoragarria.

        Arrosa misteriozkoa.

        Dabiden dorrea.

        Dorre borthitza.

        Urrezko palazioa.

        Bakearen arka.

        Zeruetako Portalea.

        Goizeko izarra.

        Erien osasuna.

        Bekhatorosen ihezlekhua.

        Doloratuen konsolatzaillea.

        Giristiñoen faborea.

        Aingeruen Erregiña.

        Patriarken Erregiña.

        Profeten Erregiña.

        Apostoluen Erregiña.

        Martiren Erregiña.

        Konfesoren Erregiña.

        Birjiñen Erregiña.

        Saindu Guztien Erregiña.

        Gu bekhatoreak izanagatik, entzun gaitzatzu, andrea, plazar baduzu.

        Othoitzten zaitugu guri ardiatsteaz egiazko urrikimendua, entzun gaitzatzu.

        Othoitzten zaitugu, ardiatsteaz Eliza sainduari, eta giristi-populu gustiei bakea eta batasuna, entzun gaitzatzu, plazer baduzu.

        Othoitzten zaitugu ardiatsteaz gure Aita Saindu, zure zerbitzari N.I. eta gure prelatei, eta Eliza gustiari grazia dibinoaren airea. Entzun gaitzatzu...

        Othoitzten zaitugu ardiatsteaz guri eta giristiño Prinze gustiei bakea eta osasuna, eta etsaiei beheramendua, Entzun gaitzatzu, plazer baduzu.

        Othoitzten zaitugu ardiatsteaz fidelen arima defuntu gustiei bethiereko errepausua. Entzun gaitzatzu, plazer baduzu.

        O Jainkoaren Ama, entzun gaitzatzu, plazer baduzu.

        Jainkoaren Bildotsa, zeiñak khentzen baititutzu munduaren bekhatuak, barka diezaguzu, Jauna. Entzun gaitzatzu, plazer baduzu.

        Jainkoaren Bildotsa, zeiñak khentzen baitutzu munduaren bekhatuak, barka diezaguzu, Jauna. Entzun gaitzatzu, plazer baduzu.

        Jainkoaren Bildotsa, zeiñak khentzen baititutzu munduaren bekhatuak, urrikal gakizkitzu.

        Jauna, urrikal gakizkitzu.

        Jesus-Kristo, urrukal gakizkitzu.

        Jauna, urrikal gakizkitzu.

        Jesus-Kristo, urrikal gakizkitzu.

        Jesus-Kristo, entzun gaitzatzu.

Othoitz egigun

        O Jauna, othoitzten zaitugu ahalik humilkiena, zure graziaren hedatzeaz gure bihotzetara; gu, zeiñek Aingeruaren erranez ezagutu baitugu Jesus-Kristo zure Semearen inkarnazionea, arriba gaiten haren Pasionearen eta haren Heriotzearen merezimenduez Resurrekzionearen gloriara, Jesus-Kristo Jaun beraren faborez. Hala biz.