ZALDIZAHARRA

Hemen gaude hitz hartuiak,

Konplitu nahiz botuiak:

Zaldi zahar famatuiak

Merexi ditik kantuiak:

Kurriturik merkatuiak

Ezin egin tu tratuiak.

Sujeta dugu Txiletik;

Sud-eko Amerikatik,

Zaldi zahar baten gatik.

Deus onik baden eztakit:

Ez daite jeiki lurretik...

Hala jakin dut nunbaitik.

Saltzalea Eskualduna:

Muthil gazte fanfarruna...

Egin uste du fortuna,

Zeren baitu zaldi ona!

Erostuna da Gaskoina:

Gostako zako fazoina!

Zaldia zuen eria

Aspaldi kendu nahia;

Erran behar da egia

Triste zuela begia;

Nun nahi den eroria,

Menbroz ez daite balia.

Orhoituko gira beraz

Urtharrilaren hamarraz.

Zaldia zagon larru-has...

Pherekatuz oihal-zedaz

Muthilak joan zuen gabaz

Despejitu ere arras.

Gaskoinaren arrangurak

Ez ahal ziren laburrak;

Orhoitzen hil beldurrak

Eta galdu sos ederrak:

Saltzalearen gezurrak

Trenkatu dazko hezurrak!

Bera miriku ta barber,

Erremedioak alfer;

Ez tu izan aski laster.

Huna zertaz zuen plazer:

Bizi baita Jaunari esker.

Erraiten du Pater Noster.

Orai hor da agerian;

Sendatuko da agian!

Haurrak jarririk aldian

Noiz hilen den goardian;

Hiltzen den ordu berian

Sartuko dute hobian.

Herioa gauza beltza:

Nehork ezin zuzen pentsa!

Behin hautsiz geroz kesa,

Partitzeko baitu presa;

Botatzean azken hatsa,

Hura da memento latza!

Aitaso hasi larrutzen,

Zenbait sos behar baitzuten,

Juramentuka hari zen...

Ilobek oro entzuten:

—Nabalak eztu pikatzen—

...Zihoan trabatzen baitzen.

Nahi baduk bertzen ganik,

Eman behar duk lehenik...

Zaldiak ez badu janik

Ez tik egiten lan onik.

Orai joana da hemendik

Abisu hori emanik.

Finitu dira tratuiak,

Aintzinian botu hartuiak...

Haur gaixoak dolutuiak,

Kasik nigarrez urtuiak

Eta deliberatuiak...

Otxalde, emanzkik kantuiak!