Nere ametsetara

etortzen zaren bakoitzean

beti zu gaixo edo ondoezik

eta ni pazientzia galtzeko zorian

baina bi detaile nagusi horietatik aparte

gainerantzean

ez da sekula ipuin berdina

gauean etxeko ateak

lotsaz irekitzen dituen neskatxena

edo kalean

kantoi baten babesa galtzean

topatzen duzunarena

neska ejerzito bat

zerbaiten inguruan bueltaka

beti begiak minez

eta inpazientzi keinu bat

buruan eta eskuetan

batzutan lepoan ere bai

haizeak kontra egingo balu bezala

ibiltzen

nere ametsetaraino

nundik eta zergatik

ailegatzen zaren bakoitzean

zure kontra eraiki ditudan defentsa guztien

garaile

nigan duzun eskubidea

erreibindikatzen duzu

urtetan jasotako

barrikadek

maitasunez, beldurrez, zorionez, zientziaz

landutako harresiek

ezin dute ezer

mahats aleak bezala lehertzen dira

zuk

buelta egiteko erabakia

hartzen duzunean

eta ez zaizu ardura

nere nigarra, oinazea

desilusioa

edo erregua

begiak ez ixteko

bi zotz jartzen baditut

betazalak ez erortzeko

hari batez heltzen baditut

hatzazalak ukabilak odoldu arte

sartzen baditut ere

alperrik da

zeren halako batean eta abisurik gabe

ez hilargiaren

edo Saturnoren eraginaz

zakurren zaunkak ia isildu direnean

buelta egiten duzu

zuri lotsarik ematen ez dizun

retirada lotsagarria

nere egile eta jabe

zarelako

behin betirako eta jotzeko premiarik ez

gaixo zaude

eta nik zaindu behar zaitut

seguru asko

ez duzu ikusten

beti ateratzen zaidan

keinu aspertua

ez dakizu ihes egin nahi dudanik

ez dakizu

zu azaldu zintezkelako

gorrotatzen ditudala amets guztiak

batzutan

gorputz lagun baten

beroa

luzaroan sentitu ondoren

batzutan sinesten dut

minutu pare batez

eta behin

aspalditxoan

ordu oso batez, inolako zalantzarik gabe

gutxienez,

behintzat ni hilda gero

argirik gelditzen ez denean

amore emango duzula

sinesterik banu

fantasmak gezurra direla

pentsatzera iritxiko banintz

halako batean

zuri kalte egiten dizun landare

bat aurkituko banu

edozein preziotan eta edozein lekutan

ontzi haundi batean

esploradoreak egosteko egiten diren ontzi horietako batean

makil luze batez astinduz

landare egosi baten kiratsak

lasaituko banindu

promesaz

eta otoitzez baretuko bazina

jainko edo deabrutan

sinetsiko bazenu

neguaz ala udaz

arduratuko bazina

zure bihotzean

haritz ezpal bat sartuz

deskantsatuko bazenu

edo Euskal Herritik kanpo

mugitzeko gauza ez bazina

hilero, lehenengo ostiraletan,

malko pare bat

eta urtero

udaberria hilobietaraino ausartzen ez denean

lore xorta kaskar bat.