Zeren

gezurra badirudi ere

zu lehenengo planoan

ez zaudeneko

momentu batzuk fabrikatu ditut.

Eszeptizismoa fabrikatu gabe

bizitzerik balego

historia bakoitza hasteko momentuan

nola bukatuko den

jakin gabe

zahartzerik balego

gure buruan

etsai maltzur bat dugula

sentitu gabe

aurrera joaterik balego

norbaitek,

ez zuk edo nik,

edozeinek agortzeko beldurrik gabe

ematen ikasi izan balu

pauso bakoitza neurtu gabe

jokatzerik bagenu

maitasuna bera ere

asmatu ote dugun susmatu gabe

sinesterik bagenu

justo puntu egokira

joateko premia zer den

jakin gabe

bidea hartuko bagenu

eta hobe noizean behin

bazterretako lizarrek

helburua ezkutatzen badute

lur pusketa bakoitza

zertarako den edo

ze arrisku dituen

kalkulatu gabe paseatu

aitzaki moral sakonak bilatu gabe

enamoratu

arrazoiak ez baitu

etorkizun haundirik

izaki bakoitza epaikari dugunean.

Egunero hasteko gogoa izango genuke

momentu hau

etengabe multiplika dadila

desiratuko genuke

gezurrak egiaztatu daitezkela

jakingo genuke

korrienteak ere

lagundu dezakela

frogatuko genuke

ez baita bekatu

olatuen indar etsituez baliatzea

ametsak zer hizkuntzatan

egiten ditudan

asmatzen saiatu gabe

bizitzerik banu

geroak

asperraldiaren keinua ez balu

dimisioa

eta oroitzapen puztuak

belar izpi bakoitzean

arantz bat susmatuko ez bagenu

gauez

izarrak soroan etzanda ikusiko genituzke

eta zenbat lan

bakoitzak

berea egin behar duela sentitzeko

nerea behintzat

guztiz garrantzitsu dela

zuri erakusteko

hainbeste saio garratz

barruko bi etsaien artean

hainbeste tranpa

mundua beteegi dagoelako

harmek asko pisatzen dutelako

baina zertarako

noiz eta zeinen kontra

bildu dut hainbeste

zimitarra

makulurik gabe bidea latza delako

eta beti aldapagora

urteek esperientzia baino gehiago

deskonfiantza dakartelako

pertsonarentzat

ez dagoelako bi harri berdinik.

Aukeraren zein aurpegik

egingo digun min gehiago

asmatu nahiean

geroak

kontuak eskatuko dizkigula

ahaztu nahiean

ez delako

sekula

amesten den maila lortzen

timoia firme eutsiz ibiltzea

ona edo txarra

den ez dakigulako

harri bakoitzak

desgrazi loti bat estaltzen duela

dakigunez

zoriontsu bakoitza

tontotzat

jotzen badugu ere.

Hainbeste banpirok

hustutzen nau

zuregana ailegatu baino lehen

hainbeste lokarrik

gateatzen nau zure kontra

a, nola egingo nuke promesa guztiak betetzeko

baina

ahoa zapalduko ez banu

zure izena

frase guztietan aterako litzake

lotsarik ez banu

paretak

zure argazkiz beteko nituzke

txuribeltzean

batzutan hilargi aurpegia duzulako

eta norbaitek

zure berri eskatzen didanean

hizketan hastean

saltoka ibili nahi nuke

ez dagoelako

poza hobeto espresatuko duen biderik

zure ispiluak

bueltatzen didan irudia

hain baitzait atsegin.

Ahalegindu arren

ez baitut zure eskuan etsai posible bat

ikusterik lortu

eta zure burua ez zait

oraindik

ridikuloa agertu

ez zelako oraindik gristatu

distantzia

mila kitometrotan

neurtzen denean ere.