VENEZUELAKO IRAULTZA BOLIBARIANOA

Caracas, 2003

 

Oroimenak gordeko du apirilaren hamaika

gora iraultza ta Chavez burrukara antxintxika

barneko indar ixila urratsez urrats jaurtika

Mirafloresko defentsan makilka eta harrika

bolibarianoz bildu zen auzoetako txirrika

chavismoaren burrukak badu bere dinamika

mugaraino eramanez sentimenduzko etika.

herri txiroaren senak nola erantzun daki ta.

 

Itzuli da, itzuli da itzuli da, itzuli da

hiru lau helikoptero hantxe jira eta bira

hango oihu ta deiadar hango gora eta biba

une hura bizi gabe ezin daiteke deskriba

orgasmoaren gailurra zirrara gorputz guztira

bezperako ilunpetik berriro amets argira

Bolibarren sustrai haiek oraindik hor bizi dira

distira hau ez itzaltzea besterik ez dut desira.

 

Hugo Chavesek zorroztu du Bolibarren ezpata

gordeta edukitzeko unea orain ez da ta

justizi goseak ere bere denbora dauka ta

soldadu ta herritarren batuketa da milaka

beharrezko zen eta da elkartasun horren grapa

xumetasun hunkigarriz gaur urrats bihar etapa

prest daude eskalatzeko igo behar den aldapa

gelditu ezina dugu chavismoaren enbata.

 

Chavez da herritarrentzat duintasunaren zutabe

iraultza hau finkatzeko oraindik osagai klabe

Bolibarren zuhaitzetik berriz sortu den landare

txiro guztien ametsak biltzen dakien ondare

ta egoera orokorra egon arren oso grabe

bere mezuak dauzka gaur mila zirkulu ta sare

helmuga da aberria izatea burujabe

yanki ta beste inori baimenik eskatu gabe.

 

Hitzaren aukera dute lehen burumakur zirenak

azal beltzekoak eta jatorrizko indijenak

bideratzen asmatuaz sentimendurik hobenak

entzun ezkero auzoetan oihukatzen diren lemak

Chavesen leialtasunak txunditu ditu gehienak

sendagai bezala hartuz Bolibarren hastapenak

gaindituz faxista hoiek jarritako zepo denak

ez daitezela zapuztu txiroen itxaropenak.

 

Prozesu honen geroak garaipenean du zaina

porrotak utziko luke sendatu ezin den mina

Venezuela da orain Cuba izan zen aintzina

Brasil eta Colombia Ecuador Argentina

zuzentasun bila doa alde hauetako grina

iraultzaren gerizpean amestuz zeru urdina

urrun egon leike baina aukera dago egina

lortzen dana izan bedi herri hauen atsegina.