HENDAIAKO GOSE GREBA

Hendaia, 1979

 

Gose greba bat egitea zen hartu zen erabakia

ezin bestean edozertara hausnartzen da izakia

zeren handitzen nolatan doan bihotzaren ebakia

madarikatzen dugu sustraitik goi mailako hierarkia

zergatik kendu behar diote euskaldunari tokia.

 

Nonahitik bada eragozpena injustizi eta traba

hain egoera larriak guri bultatu gaitu hontara

zenbat arrisku dakarren noski gaur kontzienteak gara

baina giro txar eta trumoiak nahiz guri sortu dardara

negu beltzean ondoren beti amestu ohi du udara.

 

Hegoaldetik ihes eginda Iparraldean gaudenak

terroristaren izena jarri guri pizti nabarmenak

modan daukagun demokraziak besarkatu denak

baina txikia erasotzeko legeekin dabiltzanak

dira titulu borobil hori ongi merezi dutenak.

 

Euskal Herria gure lurra da euskaldun garan partetik

oinarri horri dagokionez ez dugu behar karnetik

eskubidea sartu ta berdin ateratzeko atetik

oihukatzeko zirrikituak zuloa daukan tartetik

eta otsoa alde egin ezak ardi ta bildots artetik.

 

Gure gorputzak ibili arren gaur zutik nahiko juxtuan

urez bakarrik dauden botilak harturik gure eskuan

neke isila sentitzen dela bihotzean ta buruan

egun osoak iragan behar batek ahal duen moduan

nortasunaren arnas bezala beharrezkoa genduan.

 

Sari zaleak kalean lasai nahi dutenean tiroka

bi gobernuen laguntzarekin herriari ostikoka

euskal arima daukagunari anitz gaituzte gorrota

baina kazkabar horren pisuak ez dezala hautsi soka

bihar eduki dezagun behintzat irin txuriko errota.

 

Gose grebaren egoera hau da borroka baten lema

bukatu dadin azeri txarrak ezarritako kondena

hari onarekin josi dezagun hainbat urteko etena

gure doinuak entzun ditzagun atera behingoz antena

oilarrak kanta dezala egun berriaren hastapena.