Lotu naute gizonen uztarrian

gizon ireindua bainintzen

tarraka lepoa katetan

herriaren penetan.

Nora abiatu zara anaia

munduko pausotan

galdetzeke minez nola dabilen

anaia zapaldua?

 

Ta zergatik anaia zoaz

anaiaren asmoz galdezka

gizonok ez ote dugun kezka

guztien barnean

izatearen ezinetan nazka.

 

Ez ahaztu, arren,

gizonaren negarrak

sortzen dituela

gizonaren farrak

eta gizonak jan dezan

geratzen dela

gizona jan gabe.

 

Ez ahaztu, arren,

farrak

negarrak

eta ogiak

banaturik daudela munduan

baina ez noski berdin

guzion eskuetan,

nahiz izan bakoitzak

esku bi

eta

eskubideak.

 

Agian da izanen

batzuk gera daitezen

esku hutsik

eta bestek aurki dezaten

indarra eskuetan.

 

Anaia,

duenak mundua partitu

partitu du pusketan

ipiniaz batzuentzat negarra

besteek dezaten luzaro farra.