Zu, neska gazte

          Euskaldun lore

          Jaioterritik

Aldegin nahi dezula-ta...

Gau t’egun or zabiltz, ergel

Kilikari, txoraturik...

          Horregatik nik

          Egi bat

          Esan nahi dizut.

Egi garratza. Zuk, Ama

Zahar, mamitsu bat daukazu

Behar dezuna maitatu.

           Zu, neska

           Gazte

           Oroitu

           Zaite!

          Zu jaio zinan

          Lehengo herri

          Alaitsu, ona

Zu bezelako usotxo

Polit, egoki askoren

Kabi maitetsu, kuttuna.

          Zure guraso

          Aiton, amonak,

          Bizitu ziran

Leku eder, bikainean...

Hori zure Ama dezu

Behar dezuna maitatu.

           Zu, neska

           Gazte

           Oroitu

           Zaite!

          Goiko mendian,

          Lore-belarren

          Urrin gozoa...

Iturriko ur garbia,

Zozo ta urretxindorren kantak

Oi, nola alaitzen gogoa!

          Hango gaztainak

          Haritz ederrak

          Sagasti onak...

Mendi alai hori ere

Zure egizko Ama dezu

Behar dezuna maitatu.

           Zu, neska

           Gazte

           Oroitu

           Zaite!

          Haundi, zabala

          Arraiz betea

          Kantauri itsaso.

Batzutan bizi, haserre...

Bestetan paketsu, bare...

Euskal-arrantzaleak han

          Agertzen dute

          Trebe dirala

          Zernahitarako.

Itsas urdin hori ere

Zure egizko Ama dezu

Behar dezuna maitatu.

           Zu, neska

           Gazte

           Oroitu

           Zaite!

          Oroitzen zera

          Haurtxo zinala

          Aitonak zuri

Samurki erakutsiak

Euskerazko abestiak...

Antzineko gure kanta

          Zahar, bihoztiak

          Mundu guzian

          Berdingabiak?

Euskal kanta hori ere

Zure egizko Ama dezu

Behar dezuna maitatu.

           Zu, neska

           Gazte

           Oroitu

           Zaite!

          Oi, mendi goian

          Haritz artean

          Ederki dagon

Etxe Txiki basetxea

Ta hango sukalde goxoa

Oroitz alaiez betea...!

          Ta suburu zahar

          Beltzatik otoitz

          Gartsuakin bat

Egin da, gora, zerura

Emeki dihoan kea...

Amonatxoren txunkurrun

Abesti paregabea

          Sehaskatxoan

          Gozoro dagon

          Haurtxo txikia

Aingeru zoragarria!...

Etxe Txiki hori ere

Zure egizko Ama dezu

Behar dezuna maitatu.

           Zu, neska

           Gazte

           Oroitu

           Zaite!

          Zergatik joan

          Nahi duzu urruti

          Jaioterritik?

Horra, zure zai hor dago

Euskaldun mutil gaztea

Haritza bezin sendoa...

          Alperrik zabiltz

          Nahita’re inon ez

          Dezu idoroko

Horrelako galai onik.

Ez du lurrean parerik...

Bikain, azkar, arin, erne...

Hori zuretzat litzake

Adiskide, lagun maite.

           Zu, neska

           Gazte

           Oroitu

           Zaite!

          Zure udaberri

          Onak alde egin

          Eta negu txar

Hotza datorkizunean...

Ileak zuritzen hasi

Ta arpegia zimurtzean...

          Oi, bai, orduan

          Nahiz berandu izan

          Zure begiak

Zuzenduko dituzula

Zu jaio zinan lekura

Baserri zahar, maitetsura!

           Zu, neska

           Gazte

           Gaur... behin

           Betiko

           Oroitu

           Zaite!!!

                                                    Biarritz’eko olerki sariketan

                                                    1949’go urtean saritutako olerkia.