Negarrez dago, etxe-txokoan

Gaztainazpiko ama gaixoa...

          Atzo goizean kendu diote

Bere semetxo bihotzekoa...

          Negarrez dago urrun begira,

Larramendiko neska maitea...

          Orain ez da lehen bezela igotzen

Goiko iturrira mutil gaztea.

          Nork zatitu du horren gogorki

Emakume zahar berdingabea?...

          Nork zimeldu du udaberrian

Landa alaiako LORE garbia?...

                Notin txar,

                Gaiztoa,

                Bihotzik gabekoa!

                Begi beltzduna,

                Gosetien laguna...

                Burruka

                Zalea

                Errukirik gabea.

                Hartu duk

                Gaztea

                Amatxoren semea...

                Bialdu duk gudara

                Gizon onak hiltzera;

                Eta hi, hor

                Etxean

                Gelditu haiz ohean...

                Burruka

                Nahi al duk?

                Legez hik jun behar duk

                Eta inor ez biali

                Hire indarraz gudari...

                Bilaua

                Gaiztoa

                Gogo txar-txarrekoa!

                Ez dituk

                Ikusten

                Bihotzak erdibitzen,

                Gizonak alkar hiltzen,

                Eta bihotzak hausten?

                Ez dek, ez

                Ikusten

                Hire odola isurtzen!

                Ez dituk

                Ikusten

                Ama gaixoak mintzen,

                Neska politak urtzen,

                Eta aitak ere erotzen?

                Ez duk, ez

                Ikusten

                Hire semea amaitzen!

                Besteren

                Samina

                Hiretzat gauz arina.

                Oi, gazteen odola!...

                Ta hiri ez dik axola...

                Gizon beltz

                Idorra...

                Bihotza duk gogorra!

                Helduko

                Dek hire

                Azken ordua ere

                Ta hire heriotzagatik

                Inork ere ez negarrik...

                Geldi zak

                Gaur guda

                Eta egintzak gentza

                Bestela

                Bihar, hi

                Oi, zeinen estu, larri!...

          Negarrez dago, etxe-txokoan,

Gaztainazpiko ama gaixoa...

          Atzo goizean gudan hil zaio

Bere semetxo bihotzekoa.

          Negarrez dago, gelan gordeta,

Larramendiko neska maitea...

          Ez da gehiago arin igoko

Goiko iturrira mutil gaztea.

                   Besteren

                   Samina

                   Hiretzat gauz arina

                   Oi, gazteen odola!

                   Ta hiri zer dik axola...

                   Gizon beltz

                   Idorra...

                   Bihotza duk gogorra!!!